tekststørrelseindkøbskurv
AllaffigitigutIkinngutinnut ingerlateqqiguk
 

Tupa naaggaaruk!

Tupatorneq Kalaallit Nunaanni suli annertuumik ajornartorsiutaavoq. Inersimasut 66 %-ii pujortartuupput. Inuusuttuaqqat meeqqallu akornanni pujortaattarneq siammarsimavoq. Meeqqat atuarfianni angajullerni atuartut affaat pujortartarput. Nappaatit arlalissuit tupatornikkut pinngorsinnaasarput piaarpallaamillu toqussutaasinnaasarlutik.
 
"Pujortartarneq annertuumik ajornartorsiutaavoq tupatortartullu ikilisinniarlugit Naalakkersuisut arlalitsigut iliuuseqarput. Ilaatigut pujortartarneq pillugu inatsit nutaaq sukannersorlu 2010-mi atuutilersoq aqqutigalugu, ilaatigullu tupat akitsornerisigut kiisalu pinaveersaartitsinikkut peqqinnerulersitsiniaanikkullu suliniuteqarnikkut. Innuttaasut peqqissuunissaat pillugu suliniutip "Inuunerittap" nutarterneranut atatillugu suliassanik tulleriiaarinermi, pujortartarnerup annikillisinneqarnissaa sallerni inissisimavoq", Peqqissutsimut Naalakkersuisoq Agathe Fontain oqarpoq nangillunilu:

 

"Nunarsuaq tamakkerlugu tupamik pujortartarneq akiorniarlugu ullorititap nunarput tamakkerlugu malunnartinniarneqarnissaa neriuutigaara. Taamaasiornikkummi peqqinnissakkut ajoqusiisinnaanerpaat ilaannik ersersitsinissamut periarfissatsialammik atuinerussaaq. Ulloq taanna malunnartinniarlugu Qaasuitsup kommuniani tupatortarneq akiorniarlugu unammisitsisoqarniarnera pujortarunnaarnianullu pikkorissaanernik neqerooruteqartoqarniarnera ilisimavara. Taama pilersaarneq suliniutitsialavissuartut isigaara."

 

Nunarsuaq tamakkerlugu tupamik pujortartarneq akiorniarlugu ullorititamut tunngatillugu 
Peqqissutsimut Naalakkersuisoqarfiup KNR suleqatigalugu PAARISA-p 2010-mi paasititsiniaaneranut atatillugu radiokkut aallakatitassiat "Pujortarfiunngitsumik avatangiiseqarneq"-mik qulequtsikkat aallakaateqqinneqarnissaannik suleqatigiipput.

 

Aallakaatitassiaq siulleq nunarsuaq tamakkerlugu tupamik pujortartarneq akiorniarlugu ullorititami maajip 31-ani aallakaatinneqassaaq.

Tamatuma saniatigut tupamik pujortartarneq akiorniarlugu ullorititap malunnartinneqarnissaanut tunngatillugu  Peqqissutsimut Naalakkersuisoqarfik paasissutissiorpoq isumassarsiviusinnaasunillu atortussiorluni. Taakku www.paarisa.gl -imi kiisalu www.peqqik.gl -imi aaneqarsinnaapput. 

 

Tupamik pujortartarneq akiorniarlugu ullorititaq iluatsillugu tupatorunnaarniaraanni  www.paarisa.gl, iserfigalugu radiokkut tupatorunnaarnianut pikkorissaaneq malinnaavigineqarsinnaavoq. Peqqinnissaqarfiup Inuunerissaasuisa inooriaaseq pillugu quppersagaataanni qanoq iliorluni pujortarunnaartoqarsinnaaneranik siunnersuutitsialannik aamma pissarsisoqarsinnaavoq. Quppersagaq uani nassaarineqarsinnaavoq: www.amisut.gl

 

Paasissutissat sukumiinerusut Peqqissutsimut Naalakkersuisoq Agathe Fontain oqarasuaatikkut nr. +299 55 33 03 attavigalugu pissarsiarineqarsinnaapput.