Paarisa nutaamik nittartagartaarlunilu ilisarnaatitaarpoq
Nalunngiliuk ajornartorsiutitit pillugit oqaloqateqarnissannik pisariaqartitsiguit kina attavigisinnaanerlugu? Peqqinnerulernissannut aammalu illit ilaquttatillu inuunerinnerulernissassinnut isumassarsiorniarpit? Maannamiit nittartagaq Paarisa.gl ullumikkut saqqummersinneqartoq aqqutigalugu ikiortissarsiorsinnaavutit, ilisimasassarsiorsinnaavutit tapersersortissarsiorsinnaallutillu.
Innuttaasut ilaatigut Namminersorlutik Oqartussanit paasissutissanik pissarsiniartarnerinik pitsanngorsaanissaq Naalakkersuisut anguniagarivaat. Tamatuma kingunerisaanik meeqqanut, inuusuttunut ilaqutariinnullu ikiorneqarnissamik paasissutissanillu ujartuineq ajornannginnerulissaaq. Qanoq iliorluta tamatta ataasiakkaarluta - ataatsimoorlutalu - peqqissunngornissarput inuunerissaalernissarpullu angussaneripput pillugit ilisimasanik pissarseriaannaalissaagut. Tamanna nuna tamakkerlugu pitsaaliuinermut nittartakkap nutaap Paarisa.gl-ip pilersinneqarneranut tunngaviuvoq. Neriuppunga inuit nittartagaq nutaaq atorlualissagaat, amerlasoorpassuillu ikiortissarsiornermut, ilisimasassarsiornermut isumassarsiornermullu atorluassagaat.
Nittartagaq nutaaq meeqqanut, inuusuttuaqqanut ilaqutariinnullu iluaqutaasussatut suliniutit nutaat 2019-imut Aningaasanut Inatsimmi aningaasaliiffigineqarnikut ilaannut ilaavoq. Meeqqanut paasissutissiisarnissaq immikkut suliassaqarfiuvoq pingaartinneqartoq, maannakkut suli ineriartortinneqartoq, ukiaaneratalu ingerlanerani saqqummiunneqartussaq. Piffissap ingerlanerani aamma imarisat nutaat sulianik ilisimasalinnut atugassat ilanngunneqarumaarput.
Ilisarnaat nutaaq
Ullumikkut aamma Paarisap ilisarnaatitaani nutaaq saqqummersippaa.
Ilisarnaat titartagartalersuisartumit Ivalu Risagerimit ilusilersorneqarpoq. Ilisarnaat piuminartumik ullutsinnullu naleqquttumik aammalu uummatitut ilusiligaavoq, taaguut Paarisa ungaloqqallugu, ima isumaqartinneqarluni “Immitsinnut paarisa”. Uummat “Inuuneritta”-mut innuttaasut peqqissuunissaannik suliniummut taaguutaasumut tunngaveqartinneqarpoq. Paarisap ilisarnaataa nutaaq nikerarsinnaasumik ilusiligaavoq, qalipaatillu assigiinngitsuusinnaallutik, aammalu ungalusaqartillugu ungaloqartinnaguluunniit aamma atorneqarsinnaalluni.
Paarisa pingajussaa ilisarnaatitaarpoq. Taaguut Paarisa ilisarnaatitullu atoqqaartinneqartoq 1987-iminngaanneersoq Isak aamma Astri Heilmannimit pilersinneqarput. Paarisap ilisarnaataa 2005-imi Thue Christiansenimit nutarsarneqarpoq.
Sukumiinerusumik paasissutissat uunga attaveqarluni pissarsiarineqarsinnaapput: Immikkoortortami pisortaq Ditte Sølbeck oqarasuaat +299 34 60 37 imaluunniit e-mail ditt@nanoq.gl