Nakuuserneq

Nakuuserneq akuerineqanngisaannassaaq. Nakuuserfigineqaruit nalunngisalluunniit nakuuserfigineqarpat pingaaruteqarpoq ikiortissarsiorlutillu politiinut nalunaaruteqarnissat.

TUSAANNGA

Ajornartorsiutit nammineq aaqqissinnaanngitsutut misigisatit pillugit oqaloqateqarnissamik pisariaqartitsiguit Tusaannga attavigiuaannarsinnaavat.
Attaveqarneq akeqanngilaq kinaassutsimillu isertuussisuulluni.

Tusaannga ulloq unnuarlu, sapaatip akunnerata ulluini tamani ammasalissaaq.

SMS

1899

Oqarasuaat

80 11 80

Ilinnut ikiuutissat

Kikkut tamarmik ikiorneqarnissartik pisinnaatitaaffigaat. Nakuuserneq nunatsinni inerteqqutaavoq aamma kinaluunniit nakuuserfigineqassanngilaq. Nakuuserneq politiinut nalunaarutigiuk.

Sianerit: 70 14 48

Nakuuserfigineqarsimavit, imaluunniit nakuuserfigineqarsimanerlutit nalornissutigiviuk?
Oqaloqateqarnissannik imaluunniit ikiorneqarnissannik siunnersorneqarnissannillu pisariaqartitsiguit Tusaannga attavigiuaannarsinnaavat. Nakuuserfigineqarsimasunut qimarnguiit allallu neqeroorutigineqartarput. Tamanna pillugu Tusaannga-mit ilitsersorneqarsinnaavutit. Tusaannga attavigigukku kinaassutsit isertuussinnaavat.

Sianerit: 80 11 80 imaluunniit SMS: 1899

Ilaquttanni nakuusertoqartarpa?
Ilaquttanni nakuusertoqartarpat taava ikiorneqarnissat pisinnaatitaaffigaat. Illit nakuuserfigineqartaruit ilaquttanniluunniit alla nakuuserfigineqartarpat pingaaruteqarpoq nakuuserneq unitsinniarlugu tamanna pillugu oqaloqateqarnissat.

Meeqqamik nakuuserfigineqartartumik nalunngisaqarpit?
Meeqqap inuusuttulluunniit nakuuserfigineqartarneranik pasitsaassaqaruit taava innuttaasutut pisussaaffigivat isumaginninnermik oqartussaasunut nalunaaruteqarnissat. Qanoq ikiuisinnaanerit nalunaaruteqarsinnaanerillu pillugu MIO-p nittartagaani paasisaqarnerugit.

Inooqatigisannut nakuusertarpit taamaaliortarnerillu unitsikkusullugu?
Alliaq attavigiuk.

Alliaq-mi neqeroorut akeqarnanilu kinaassutsimik isertuussiffiuvoq. Alliaq nipangiussisimasussaatitaavoq.

Misigisama kinguneri ukiorpassuarni isertugaataanikuupput annertuut. Tassanngaannaq oqaasinngortissinnaanngorpakka, tusarneqarlungalu takuneqarpunga. Ikiorneqarsimanngitsuuguma qularinngilara atugarliorujussuarsimassagaluarlunga.

Arnaq meeraalluni kinguaassiuutitigut nakuuserfigineqarsimasoq

Piviusoq

Nakuuserneq tassaavoq iliuuseq sioorasaarinerluunniit allamik ajoqusiisoq, annersitsisoq, ersilersitsisoq innarliisorluunniit.

Nakuuserneq timikkut, tarnikkut kinguaassiuutitigulluunniit nakuusernerusinnaavoq. Nakuuserneq nakuusernerusinnaavoq toqqaannartoq toqqaannanngitsorlu, soorlu nakuusertumik takunninneq. Qanorluunniit ikkaluarpat nakuuserneq akuerineqanngisaannassaaq.

Nakuuseriaatsit assigiinngitsorpassuusinnaapput, nakuuseriaatsillu tamarmik ajoqusiisarput. Taamaattumik nakuuserfigineqaruit nalunngisalluunniit nakuuserfigineqarpat ikiortissarsiornissat pingaaruteqarpoq. Matuma ataani nakuuseriaatsit assigiinngitsut pillugit atuarsinnaavutit.

Timikkut nakuuserneq

Timikkut nakuuserneq illit nammineq timinni malugisinnaavat. Timikkut nakuuserneq timikkut anniartitsisarpoq. Timikkut nakuuserneq tassaasinnaavoq pussussineq, ajatsineq, qisersineq, isassineq, tukersineq tillussineq atortulerlunilu nakuuserneq.

Timikkut nakuuserneq takuneqarsinnaasunik kinguneqartitsisinnaammat nakuuserfigineqartumillu timikkut anniartitsisarmat amerlanerit ’nakuusernertut ilumoortutut’ isigisarpaat.

Tarnikkut nakuuserneq

Tarnikkut nakuuserneq amerlanertigut isertortumik pisarpoq takujuminaassinnaasarlunilu. Tarnikkut nakuusernerit tassaasinnaapput nikassaajuarneq, aqutsiuarneq, sinngajuarneq sioorasaariuarnerlu. Aapparmit aqunneqarnerusinnaavoq. Tarnikkut nakuuserneq amerlanertigut ajorneruleraluttuinnartarpoq.

Kinguaassiuutitigut nakuuserneq

Kinguaassiuutitigut nakuuserneq tassaavoq atoqateqarnermut tunngatillugu killissarititannik allat qaangiinerat, soorlu iluanngitsumik attorneqarneq atoqateqarnermi kajungerinngisamik toqqaannartumik toqqaannanngitsumilluunniit iliuuseqarnissamut ilaanissamulluunniit pinngitsaalineqarneq. Tassaasinnaavoq allat atoqatigiinneranni pinngitsaalisaasumik najooqquneqarneq imaluunniit piumasarinngisannik atoqatigineqarnerit.

Atuarsinnaasatit allat

Kinguaassiuutitigut innarliinerit

Kinguaassiuutitigut innarliinerit tassaapput iliuutsit kinguaassiuutinut tunngasut inuup killissaanik qaangiisut.