Najukkami kissaatigineqar­tut

Kikkut suut kissaatigaat? 

Kajumissutsimik nukiusut najukkami qanoq ikorfartuisinnaanerat najukkami innuttaasut suliaqartullu oqaloqatigalugit Paarisamit misissorneqarpoq. Najukkami kissaatigineqartut ilaat uani takuneqarsinnaapput:

Orniguttarfinnut ataqateqarneq
Aningaasarsisoqarneranut atatillugu meeqqat inuusuttullu toqqissisimaffigisinnaasaanut orniguttarfinnut pilersinneqaqqammersunut atassusiisinnaasunik kajumissutsimik iliuuseqartoqarnissaa Isumaginninnermut Aqutsisoqarfimmit piumaneqarpoq. Orniguttarfiit Ilulissani, Nanortalimmi, Aasianni, Tasiilami Sisimiunilu pilersinneqarput.

Pinngortitami sammisassat
Sumiiffinni arlaqartuni pinngortitami sammisassaqartitsisoqarnissaa ujartorneqarpoq, meeqqat inuusuttullu qarasaasiaq qimallugu inersimasunit angalaaqatigineqarsinnaallutik. Nanortalimmi spejderinut peqatigiiffeqalernissaa kissaatigineqarpoq. 

Digitalistit inuusuttunit inuusuttunut
Narsami Digitalistit ujartorneqarput. Inuusuttunit inuusuttunut atoqatigiinneq pillugu paasititsiniaasunik - Sexualistinik soorlu peqartoq, inuusuttut internetsikkut attaveqaqatigiiffinnik atuineq pillugu naligalugit siunnersorneqarnissamik pisariaqartitsipput. 

Unnuarissat tapersersortilerlugit
Sumiiffinni arlaqartuni aqqusinermi toqqissisimalersitsisussanik kiisalu meeqqanik inuusuttunillu oqaloqateqartussanik Unnuarissanik ujartuisoqarpoq. Sumiiffinnili arlaqartuni kajumissutsimik suliaqartut kommunemit/inuussutissarsiortunit ikorfartorneqarnissamik pisariaqartitsipput sulisussarsiornermi, meeqqanik innarliisimannginnermik uppernarsaatinut, sulinissamut pilersaarutinut, ukiumoortumik naatsorsuutinut, aningaasanik qinnuteqarnermut il.il. 

Anaananut kisermaanut ilinniarnermik ingerlataqartunut ikorfartuineq
Qaqortumi inuusuttunut anaananut kisermaanut ilinniarnermik ingerlataqartunut kajumissutsimik "ilaqutariinnut ikinngummik" imaluunniit "ningiukkunnik" ikorfartuisinnaasunik kajumissutsimik iliuuseqartoqarnissaa ujartorneqarpoq. Nuummi ilinniartunik siunnersuisartut assinganik pisariaqartitsipput anaanaasut namminneq attavigisatik qimallugit illoqarfinnut anginerusunut ilinniariarlutik nuukkaangata. 

Nereqatigiinneq 
Illoqarfinni arlaqartuni nereqatigiinnermik aaqqissuussisinnaasunik kajumissutsimik iliuuseqartoqarnissaa ujartorneqarpoq - ataatsimoornerulernermik pilersitsiniarluni. Qaqortumi iluatsilluartumik tamanna ingerlasimavoq, kajumissutsimilli iliuuseqarneq tam anna unissimalluni.

Kajumissutsiminnik sulisut illoqarfissinni qanoq iluaqutaasinnaappat? 

Illoqarfissinni kissaatigineqartut oqaluttuarisiuk, pingaartumik inuiaqatigiinni suliniaqatigiiffiit aningaasaateqarfiillu najukkassinni pisariaqartitasi atuarsinnaaniassammassuk: Nalunaarummik maana nassiussigit.