Tasiilami namminneq kajumissutsiminnik sulisut nalliuttorsiutigineqarneri
Tasiilami nammineq kajumissutsiminnik suliaqartartut amerlapput katersortarfimmilu nalliuttorsiutigineqarnerat pissusissamisoorpoq. Nalliuttorsiutiginninneq kommuni suleqatigalugu pivoq, illoqarfimmilu nammineq kajumissutsiminnik suliaqartut immikkut ittumik kommunip tapersersortarpai.
Suliniut 4 tassaavoq isumaginninnerup iluani nammineq kajumissutsimik suliniuteqarnernut sinaakkusiussat pitsanngorsakkat. Tamannalu pillugu illoqarfimmi namminneq kajumissutsiminnik sulisut suliaannik isumassarsiorniarluni Tasiilameeqqammerpoq.
Tasiilarmiorpassuit nammineq inuiaqatigiinnut ikiuullutik suliaqartarput. Assersuutigalugu timersortarfimmi meeqqanik sungiusaasarput, iliveqarfimmi sanningasunik pisoqqanik qalipaasarput, angajoqqaaqatigiit aaqqissuuttarpaat, illoqarfimmi innuttaasunut ataatsimoorfiusinnaasunik aaqqissuussisarput, inuusuttut illuanni, katersortarfimmi timersortarfimmiluunniit ikiuuttarput, najukkami ataatsimiititaliami peqataasarput, inuusuttumiit inuusuttumut atoqatigiinneq pillugu atuartitsisarput imaluunniit isiginnaartitsisartoqatigiinnik ingerlatsisarlutik.
Nammineq kajumissutsiminik sulisoq allanngueqataasarpoq
Qanoq ittumilluunniit suliaqarluni ikiuisoqaraangat tamatigut illoqarfimmi nammineq kajumissutsiminik sulisoq allanngueqataasarpoq. Taamaattumik nammineq kajumissutsiminnik suliaqartartut ataatsimut nereqatigiinnertalimmik, aliikkusersuinertalimmik aamma nammineq kajumissutsimik suliaqartarneq pillugu oqaloqatigiinnertalimmik nalliuttorsiutigineqarnissaat pissusissamisoorpoq. Nuannersumik unnussiuaartoqarpoq, ataatsimoortutut misigisimasoqarluni, nipituumik illartarluni nuannersumillu nipilersortoqarluni.
Kommunimi peqqinnermut sammisassaqartitsinermut, sunngiffimmik kulturimillu sulisut nammineq kajumissutsiminnik suliaqartartut assut qujamasuutigaat. Taamaattumik kommuni aaqqissuussinermut pilersaarusiortuullunilu aggersaavoq. Inuusuttut nammineq kajumissutsiminnik suliaqartartut marluk aaqqissuussap aallartinnissaa sioqqullugu nerrivilersuillutillu issiavilersuipput.
Kommunimi sulisut illoqarfimmi kajumissutsiminnik suliaqartartunik attaveqarluartarput, kommuni suliassanik allaffissornermillu nammineq kajumissutiminnik sulialinnut ikiuutissalluni piareersimajuaannarmat. Taamatoqqissaaq ikiuineq nunap sinnerani nammineq kajumissutsinnik suliaqartunit apersuutigineqakkajuttarpoq. Nammineq kajumissutsimik suliaqartartut nukillaariartunnginnissaat aamma nammineq kajumissutsiminnik sulinerup aaqqissuussaanissaanik piumasaqaatit naapertorlugit allaffissornermik sulianit ikiliartunnginnissaat pillugu taama ikiuuttoqartarpoq.
Kommunimik suleqateqarluarneq
Nammineq kajumissutsiminnik suliaqartartut namminneq oqarneri naapertorlugit kommuni assut suleqatiginnikkusuttarpoq aamma nammineq kajumissutsiminnik suliaqartartut suliaminnik ingerlatitseqqiinissaannut kajumissaarisarpoq. Nammineq kajumissutsimik suliaqartarnerup oqaloqatigiissutiginerani nammineq kajumissutsiminnik suliaqartartut kommunip tapersersuinera illoqarfimmi suliniuterpassuarnut pingaaruteqarluinnartuusoq oqaluttuarput:
- Arlaannik ikiorneqarnissamik pisariaqartitsilluni kommuni isumassarsiorfiginiarlugu aperisinnaasarnera assut iluaqutaasarpoq, taama kajumissutsiminik suliaqartartoq ataaseq oqarpoq.
Kommunip ininik akeqanngitsumik atukkiisarnera illoqarfimmi kajumissutsiminnik sulialinnut assut pingaaruteqarpoq illoqarfimmiunullu sammisassanik peqatigiiffiit neqerooruteqartarnissaannut tunngaviliilluartarluni:
- Kommunep sammisassaqartitsiviisa arlallit akeqanngitsumik attartortitsisarnerat sammisassat ingerlalluarnerannut pisooqataavoq, kajumissutsiminik suliaqartartoq ataaseq taama oqarpoq.
Najukkami ataatsimiititaliaq peqatigiiffinnut kajumissutsiminnik suliaqartartunut aamma pitsaasumik assut tapersersuisarpoq, taamaalillutik inuiaqatigiit illoqarfimmi sulianik pitsaasunik amerlasuunillu suliniuteqarnissaminnut imminut akilersinnaasunik tunngavilerneqarput.
Inuiaqatigiinni assiigiinngitsutigut suleqatigiissinnaaneq Tasiilamiuni aamma atuuppoq. Pisortat suliffeqarfiutai, inuussutissarsiortut inuiaqatigiillu isumaginninermut suliniutinik pitsaasunik illoqarfimmi innuttaasunut tamanut atuuttunik nassaarsiullaqqissuupput. Tamanna assersuutissarpassuaqarpoq.
- Assigiinngitsorpassuusugut ataatsimoorluta suleqatigiinnissatsinnut iluatsitsissagutta kommuni siuttoralugu aqqutissiuussisorissavarput. Immitsinnut pisariaqartinnerput aamma tamatta pingaaruteqassuserput takutittariaqarpagut. Taamaaliorutta immitsinnut pitsaasumik ikioqatigiissaagut, immikkoortumi pisortaq Hjørdis Viberg taama oqarpoq.
Ataatsimoorluta kivitseqatigiikkutta
Ataatsimoorluta tamatta kivitseqatigiikkutta angusaqarnerpaasasugut taannarpiaq suliniut 4-mi pingaarnertut oqariartuutigineqartarpoq. Kajumissutsiminnik suliaqartartut najukkami inunnut suliniutit naammassisinnaassappatigit, kikkut tamarmik tapersersuisariaqarput. Isumasioqatigiinnermi ataatsimi suliniutip 4-p siorna aaqqissuussaani, peqataasunit aamma oqariartuutigineqarpoq pisortat suliffeqarfiutai, inuusutissarsiortut inuiaqatigiillu tamarmik suleqatigiilerpata nammineq kajumissutsimik suliaqarneq aatsaat siuariartorsinnaasoq.
Suliallit assigiinngitsut qanoq suleqatigiisinnaanerannut Tasiilaq assersuutitsialaavoq aamma nammineq kajumissutsiminnik suliallit iliuuseqarnissaminnut periarfissaat kommunimit allanillu suliaqartartunit suliassatigut tapersersorneqarluni pitsanngoriartitsisinnaanermut assersuutitsialaalluni.
Nalliuttorsiutigineqarnermi nammineq kajumissutsiminnik suliaqartartut tuimikkut pissusissamisoortumik pattalaarneqarput namminerlu kajumissutsimik suliaqartarneq pillugu ataatsimoorussinerat nukittorsarneqarluni. Suliniut 4 najukkami nammineq kajumissutsiminnik suliallit ineriartortinneqarnissaannut qanoq atugarissaartitsisoqartarnerarat pillugu ilisimasanik naleqarluartunik pissarsilluarpoq.
