Najukkani nukiit naleqartitallu meeqqat inuusuttullu atugaasa siuarsarnissaannut toqqammaviussapput
Nalunaarusiami nutaami Qeqqata Modelip ukiuni pingasuni ingerlasimanera killiffissiorneqarpoq: Qeqqata Kommuniani meeqqanut inuusuttunullu tamanik peqataatitsisumik peqqinnartumillu ataatsimoorfiusut qulakkeerniarlugit suliassaqarfiit akornanni suleqatigiiffiusuni meeqqat inuusuttullu atugaat pillugit suleqatigiinneq.
Paarisa aamma Innuttaasut Peqqissusiannik Ilisimatusarfik suleqatigalugit Qeqqata Kommunia suliniutit meeqqat inuusuttullu peqqissusaannut atugaannullu sammisut inerisarlugillu uppernarsaasersuilluni 2020-ip aallartinnerani aallartippoq. 5. - 10. klassemi atuartut immikkut sammineqarput, sulinerlu HBSC Greenlandip meeqqat atuartut pillugit ukiup aappaa allortarlugu qanoq ingerlasoqarneranik misissuisarnerani malinnaaffigineqarpoq. Meeqqat inuusuttullu aanngajaarniutinik, soorlu tupamik imigassamillu atuisalertartut ikinnerulersimanerat meeqqallu qinngasaarneqartutut misigisartut ikinnerulersimanerat pingaartumik ukkatarineqarput.
Uppernarsaanermik tunngaveqarluni suliniut nukittuffiit naleqartitallu qitiutillugit
Suleqatigiinnermit ataatsimut suliniarneq Qeqqata Modelimik taaneqarsimavoq, suleriaaserlu kommunimi pinaveersaartitsinerup iluani annertuumik allannguisoqarneranik takutitsisuulluni. Pissutsimmi nalorninartut ataasiinnarmik isiginnittaaseqarluni isiginerannut taarsiullugu meeqqat inuuneranni pissutsit illersuutaasut ukkatarineqarput. Ilutigitillugu suliniut uppernarsaanermik tunngaveqarpoq atuutilersitsinerlu malinnaaffigeqqissaarneqarluni.
Tamatumani najukkani nukiittuffiit naleqartitallu sulinermut ilanngunneqarsimapput innuttaasut peqatigalugit isumasioqatigiinnernut arlaqartunik qaaqqusinikkut, tassani najugaqarfinni ataasiakkaani nukittoqutaasut qanoq isigineqarnerat najukkamilu isumalluutinik sumut aallertoqarsinnaanera oqaasertalersorneqarlutik. Qeqqata Modelimi suliat suliniutillu tamarmik najukkani nukiittuffiit naleqartitallu najukkanilu isumalluutit tunngavigalugit tamakkiisumik isigaluni iliuuserineqartussatut inerisarneqarsimapput.
”Allannguineq anguniarlugu meeqqat inuusuttullu inuuneranni isiginiagassat tamarmik isiginiartariaqarpagut, inuttut ilivitsutut katitigaasutullu ulluinnarni inuunermi assigiinngitsorpassuarnit sunnerneqartartutut isigissavavut”, Ingelise Olesen, Ilisimatusarfimmi ilisimatusarnermik ataqatigiissaarisoq, oqarpoq nangillunilu:
”Pitsaasumik peqqinnartumillu inuuneq tapersersorniarlugu taamaammat ilaqutariit, ikinngutit, atuarfik sunngiffimmilu inuuneq ilanngullugit siammasissumik suliniarnissaq pingaaruteqarpoq, suliniullu najukkami atugarissaarnermik nuannaarnermillu pilersitsinermik tunngaveqassalluni”.
Meeqqat inuusuttullu atugaasa pitsanngorsarneqarnissaannik kissaateqarneq
Qeqqata Kommuniani suliniut meeqqat inuusuttullu atugaasa siuarsarneqarnissaannik annertuumik kissaateqarnermik ingerlanneqarpoq, ukiunilu kingullerni suliniuterpassuarnik aallartitsisoqarsimalluni. Suleqatigiinneq suliniutinik marlunnik aalajangersimasunik inerisaallunilu aallartitsisimavoq, tassalu Angajoqqaanik isumaqatigiissutit aamma Nunaqarfinni isumaqatigiissutit, meeqqat inuusuttullu atugarissaarnissaannik ikorfartuisunik aanngajaarniutinillu atuinerup pinaveersaartinnissaannik siunertaqartumik illoqarfinni angajoqqaat atuarfiit aqqutigalugit najugaqarfinnilu mikinerusuni innuttaasut tamarmik ataatsimut isumaqatigiissuteqarnissamut qaaqquneqarsimallutik.
”Meeqqat peqqissusaat atugarissaarnerallu pillugit illoqarfinni nunaqarfinnilu angajoqqaanik innuttaasunillu suleqateqarneq naleqartorujussuuvoq. Kommunitsinni najugaqarfinni tamani angajoqqaat inersimasullu meeqqat inuunerannut aalajangeeqataasorujussuusarput, meeqqallu ulluinnaani pissusissamisuunngitsumik pissuseqarnermik pinaveersaartitseqataangaatsiarsinnaapput, meeqqallu ataatsimoorfinni peqqinnartuni peqataanerat nukittorsarluarsinnaallugu. Qeqqata Kommuniani meeqqat inuusuttullu peqqissusaat atugarissaarnerallu qaffasissumik salliutipparput angajoqqaallu innuttaasullu iliuuseqarnerat tapersersuinerallu angusaqarnerusinnaanitsinnik misigisitsivoq,” Malik Berthelsen, Qeqqata Kommuniani Borgmesteri oqaaseqarpoq.
Isumaqatigiissutit atuarfiit aaqqissugaannik angajoqqaanut aammalu najugaqarfinni mikinerni innuttaasunik ataatsimiititsinerni ilusilersorneqartarput. Ataatsimiinnerni taakkunani kommunimi meeqqat peqqissusaat atugaallu pillugit paasissutissat nutaanerpaat saqqummiunneqartarput, taakkulu atukkanik siuarsaanissamut iliuuserineqartussat ataatsimut oqaluuserinerannut tunngaviusarlutik. Isumaqatigiissutit taakku marluk 2021-miit ukiumut ataasiarluni suliarineqartarput ataavartumillu nalilersorneqartarlutik.
Angajoqqaanik isumaqatigiissutinut nunaqarfinnilu isumaqatigiissutinut najoqqutarineqartut Paarisap nittartagaani uani atuarneqarsinnaapput.
Inuuneritta III-mut ilanngussaq pingaarutilik
Qeqqata Modelimik suliaqarneq nuna tamakkerlugu innuttaasut peqqissuunissaanut Inuuneritta III-mut, Naalakkersuisut meeqqat inuunerissut pillugit suleqatigiinnissamik periusissiaanut 2020-2030-mut toqqaannartumik iluaqutaavoq. Tassami Qeqqata Modelimi misilittakkat tunngaviillugu nunatsinni sumiiffinni allani pinaveersaartitsinermik suliaqarnermi atorneqarsinnaapput, Paarisalu Qeqqata Kommunianik Innuttaasullu Peqqissusiannik Sullissivimmik suleqateqarnikkut pingaarutilinnik misilittagaqalersimalluni Inuuneritta III-mik atuutilersitsiniarluni sulinerup ingerlaqqinneranut paasissutissanik tunniussaqartussanik.
”Inuuneritta III-mi najukkani atuutilersitsinerup qulakkeerneqarnissaa, suliaqartut sapinngisamik amerlanerpaat aallaqqaataaniit peqataatinneqarnissaat kiisalu arlaannaalluunniit suliassamik kisimik kivitsisussatut misiginnginnissaat ukkatarineqarput. Qeqqata Modelimi suleqatigiinnerup takutippaa tamanna pisinnaasoq. Qeqqata Kommuniani iluatsittumik suleqatigiinnerup kommunini allani meeqqat, inuusuttut ilaqutariillu peqqissunissaannik siuarsaaniarluni suleqatigiinnissamik isumaqatigiissuteqarusutsitsilernissaa neriuutigaarput. Ataatsimoorluta kivitsissaagut”, Paarisami immikkoortortami pisortaq, Helena Lynge Møller, oqarpoq.
Peqataasut akornanni suleqatigiinneq suleqatigiinnissamik isumaqatigiissummit 2022-ip naanerani atorunnaartumit siullermik allaaveqarsimavoq. Suleqatigiit ukiap ingerlanerani suleqatigiinnerup ingerlaqqinnissaa qanoq isikkoqassanersoq, meeqqat inuusuttullu atugaat siuarsarneqarnissaat kiisalu atuartut angajulliit akornanni aanngajaarniutinik atuinerup pinaveersaartinneqarnissaa siunertaralugit uppernarsaasersukkanik tunngaveqarluni suliniutit suli amerlanerusut qulakkeerneqarnissaat siunertaralugu suleqatigiinneq qanoq inerisarneqarsinnaanersoq isumaqatigiissutigissavaat.
Nalunaarusiaq uani atuaruk.
Paasisaqarnerunissamut:
Qeqqata Kommuniani pisortaaneq, Juliane Henningsen Heilmann, tlf. 867 301, e-mail: juhe@qeqqata.gl
Paarisami Pisortaq, Helena Lynge Møller, tlf. 345705, e-mail: helm@nanoq.gl
Innuttaasut Peqqissusiannik Ilisimatusarfimmi ataqatigiissaarisoq, Ingelise Olesen, tlf. 564 640, e-mail: uniiole@uni.gl