Isumaginninnermut Aqutsisoqarfiup Killiliisap najoqqutassiaa nutartigaq nittarsaappaa
Isumaginninnermut Aqutsisoqarfiup "Meeqqanik kinguaassiuutitigut atornerluineq pillugu ilinniagalinnut najoqqutassiaq - aappassaanik saqqummersitaq"-p nutarternera nittarsaappaa.
Najoqqutassiap nutarterneqarnera Naalakkersuisut kinguaassiuutitigut atornerluisarnermut periusissiaata, Killiliisa 2018-2022-p, nalilersoqqinneranut ilaavoq, nalilersueqqinnermi paasissutissiisarnerup ilisimasanillu avitseqatigiittarneq ilaatigut sammineqartussatut pingaartinneqarput.
Najoqqutassiaq malitseqartitsivigalugu 2020-mi nalunaarusiortoqarpoq, tassani inuit meeqqanik inuusuttunillu suliaqartartut najoqqutassiaq pillugu arlalinnik apeqquteqarsimallutik.
Nalunaarusiap inernerisa takutippaat najoqqutassiaq anguniakkamisut atorneqartartoq. Inuit meeqqanik inuusuttunillu suliaqartartut sulianik suliaqarnissaminnut annilaanngannginnerusartut aamma iliuuseqarusunnerulersimasut kiisalu atornerluisarneq aamma meeqqat inuusuttullu kinguaassiuutitigut ernumanartumik pissusilersortarneri pillugit sulisut nutaamik ilisimasaqalernerinik nalunaarusiortoqarpoq.
Malitseqartitsilluni nalunaarusiami aamma ima allassimasoqarpoq: ”… Najoqqutassiaq meeqqanik kinguaassiuutitigut atornerluineq pillugu qulequtaq paquminarunnaartitsilluni sunniuteqarsimasoq”.
Malitseqartitsilluni nalunaarusiap inerneri tunuliaqutaralugit aamma Isumaginninnermut Aqutsisoqarfiup ukiuni kingullerni marlunni nutaamik ilisimasaqalernera peqqutigalugu najoqqutassiaq nutarterniarlugu aalajangertoqarpoq.
Najoqqutassiap pingaarnertut siunertaa tassaavoq meeqqat kinguaassiuutimikkut atornerlunneqartartut imaluunniit atornerluinerit pinaveersaartinnissaat.
Meeqqat inuusuttullu kinguaassiuutimikkut atornerlunneqarsimasut assigiimmik suleriuseqarfigineqarnissaat aamma siunertaavoq, tassami najoqqutassiaq meeqqat atugarissaannginnermik ilisarnaatillit aamma kinguaassiuutitigut atornerlunneqartartutut ersiutillit qanoq sullinneqarnissaannik malittarisassanik imaqarpoq.
”"Meeqqanik kinguaassiuutitigut atornerluineq pillugu ilinniagalinnut najoqqutassiaq” 13. februar 2024-mi nittarsaanneqassaaq aamma uani www.paarisa.gl nassaarineqarsinnaanngussaaq.
Paasissutissat amerlanerusut pissarsiarerusukkukkit Paarisap immikkoortortaqarfimmi pisortaa Helena Lynge Møller ugguuna pissarsiarisinnaavat: helm@nanoq.gl imaluunniit oqarasuaatikkut 34 57 05