airplanebooksbriefcase business cogs cross election entertainment fish house law lockmedicalpeopleselfservices socialtax

Ujaruk

10. december 2020

Paarisap inuusuttut atoqateqartarnikkut peqqissuunissaq pillugu ilinniartitsisarsin­naanissaannut ilinniartikkai

2020 ingerlanerani Nuummi GUX-imi ilinniartut atoqateqarnikkut peqqissuunissamut, timillu sananeqaataanut ilisimasanik paasissutissiinermut tunngasunik ilisimasaat Isumaginninnermut Aqutsisoqarfimmi pitsaaliuinermut immikkoortortamit Paarisamit annertusarneqarput. Ilinniartut atoqateqarnikkut peqqissuunissaq siunertaralugu ambassadøritut suliaqassapput, 8. klassemilu atuartunik atoqateqarnikkut peqqissuunissaq pillugu ilinniartitsisassallutik.


Ilinniartitsinerni peqataaneq ilikkagaqarnartorujussuuvoq. Sammisanut oqallisigiuminaassinnaasunut sassarluni saqqummiisinnaaneq pikkoriffiginerulersimallugu misigisimavugut.

Sialuk Rothaus Olesenip aamma Ivaana Laursenillu Nuummi GUX-imi 1.T

Nappaatit atoqatigiinnikkut tunillaassuuttartut naartuersittarnerillu ikilisarneqarnissaat Naalaakkersuisunit erseqqissumik anguniagaavoq. Tamatuma saniatigut inuusuttut timertik peqqissumik eqqarsaatigalugu inuusaaseqassapput killiliisinnaallutillu. Taamaammat atoqateqarnikkut peqqissuunissaq eqqarsaatigalugu GUX-imi ilinniartut Paarisamit ambassadøritut ilinniartinneqarput.

Nuummi ilinniarnertuunngorniarfimmi 1.g aamma 2.g-mi ilinniartut tunniusimasut aqqaneq marluk qaammatini kingullerni arlalinni suleqatigiittarnermut, timip sananeqataataanut paasissutissiinermullu ilisimasatik piginnaasatillu annertusarpaat. Inuusuttut nutaanik ilisimasaqalerlutillu piginnaasaqalernerisa saniatigut Paarisa qanimut suleqatigisareerlugu inuusuttut misiligutitut suliniummik aallartitsipput, tassalu inuusuttut inuusuttoqatiminnut nukarliunerusunut kinguaassiutit pillugit ilinniartitsisalernermikkut kinguaassiutit pillugit ilinniartitseriaatsimik ineriartortitsisimallutik.

Inuusuttut inuusuttoqatiminnut nukarliunerusunut kinguaassiutit pillugit ilinniartitsisalernerisigut 8. klassemi atuartut kinguaassiutit pillugit toqqissisimanerullutik ilinniartinneqartalissapput. Taamaaliornikkut ilinniarnertuunngorniarfinni ilinniartut ilinniartitsisussat 8. klassemilu atuartut atoqateqarnikkut peqqissuunissamut tunngasunik ilisimasaqarnerulerlutillu inuiaqatigiinni ileqqunik eqqartuillutillu takorluuisinnaanerulissapput. Taamatut atoqateqarnikkut peqqissuunissamik ilinniartitsinerit toqqissisimasumik ingerlanneqarsinnaalissapput kiisalu ilinniarnertuunngorniarfinni ilinniartut misilittagaat, isumaliutaat, isornartorsiorsinnaanerallu 8. klassemi atuartut kinguaassiuutit pillugit atuartinneqartarneranni tunngavigineqarsinnaalissapput.

Sialuk Rothaus Olesenip aamma Ivaana Laursenillu Nuummi GUX-imi 1.T ilinniagaqartut peqqinnissamut ambassadøritut ilinniagaqaqqammersut oqaatigaat:
”Ilinniartitsinerni peqataaneq ilikkagaqarnartorujussuuvoq. Sammisanut oqallisigiuminaassinnaasunut sassarluni saqqummiisinnaaneq pikkoriffiginerulersimallugu misigisimavugut. Meeqqat atuarfiani atuartuunitta nalaani atoqatigiittarnermut tunngatillugu nammattumik ilinniartinneqartarsimannginnerput takusinnaalerparput. Peqqissumik atoqateqartarnissamut tunngatillugu 8. klassemi atuartunik atuartitsisalernissatsinnut ilisimalikkatta piginnaasattalu atornissai massakkut pissanngatigaarput”

Isumaginninnermut, Ilaqutariinnut Inatsisinillu Atuutsitsinermut Naalakkersuisoq ima oqarpoq:
”Peqqinnartumik atoqatigiittarnissaq atugarissaarluta nalilimmillu inuuneqarnissatsinnut pingaaruteqarluinnarpoq. Taamaattumik pinaveersaartitsilluni pitsaasumik sulineq pingaaruteqarluinnarpoq. Inussuttut inussuttoqatiminnik nukarliunerusunik ilinniartitsisalernerisigut ilinniartitsisarnerit toqqissisimanarnerusumik naligiillunilu oqaloqatigiittarnertut ingerlanneqarsinnaalerput. Kinguaassiutit pillugit ilinniartitsisarneq inuusuttut akornanni kinguaassiutitigut nappaatit, kannguttaatsuliortarnerit, pilersaarutaanngitsumillu naartulertarnerit akiorniarnerini sakkussaavoq pitsaasoq. Taamaattumik misiligutitut suliniummik nutaarluinnarmik saqqummiisinnaagatta nuannaarutigaarput, neriuppugullu Nuummi 8. klassemi atuartut pitsaasumik pissarsiaqaatigissagaat."

Inuusuttut tamarmik kinguaassiutitigut peqqinnartumik atoqateqartarnissaat misiligutitut suliniummi nutaami siunertaavoq. Inuusuttut ammasumik pissuseqartarlutillu suliniut iluarilluinnarmassuk anguniakkap angusinnaanissaa ilimanaateqartorujussuuvoq. Paarisap qanimut suleqatigineratigut, ilinniarnertuunngorniallu pitsaanerpaamik ilinniartitsiniassammata, nammineq kissaatigisatik aallaavigalugit suliniummut naleqqussarsinnaanissaannut periarfissaqassaaq. Tamassuma GUX-imi ilinniartut suliniummut piginneqataasutut misigitissimavai kajumissusertillu malillugu sulinerminni allanngueqataarusussuseqalerlutik.

Misiligutitut suliniut iluatsissappat tamanna illoqarfinnut allanut anginerusunut ilinniartoqarfiusunut siammarlugulu atorneqalersinnaanissaa anguniagaavoq.

Attaveqarfissaq
Sukumiinerusumik paasissutissat pillugit pisortaaneq Julie Præst Wilche attavigiuk, e-mail: jprw@nanoq.gl