Yellow September

Imminut toqunnissamik pitsaaliuineq ukiut tamaasa 10. septembarimi malunnartinneqartarpoq.

Ullormi tassani pisut International Association for Suicide Prevention (IASP) WHO suleqatigalugit ingerlanneqartarput.

Imminut toqunnissamik akiuiniarluni 10. septembarimi malunnartitsinissamut kommunit aningaasartuutinut matussutissanik qinnuteqanissaminnut periarfissaqarput. Takuuk:

Aningaasaateqarfik

Qalipaat sungaartoq toqqarneqarsimavoq, neriunnerup, qaamarnup kissalaarnerullu qalipaataattut isigineqarmat.

Tamannalu imminut toquttarneq akiorniarlugu suliniarnermi tematut qitiutinneqarpoq.

Qalipaat sungaartoq ajungitsumut, nuannaarnermut neriulluarnermullu aamma ilisarnaatigitinneqartarpoq, inunnullu isumatsassimanermik kiserliornermillu nalaataqartunut, eqqarsartaatsikkut ajornartorsiuteqartunut aammalu imminut toqunnissamik eqqarsaateqartunut neriunnermik oqariartuuteqartarluni.

Qalipaammik sungaartumik ersarissumillu toqqaanikkut imminut toqunnissamik pinaversaartitsilluni suliniarneq, ikiorneqarnissamik pisariaqartitsineq paasisitsiniaanerlu ersarinnerulersillugillu malunnarnerulersinniarneqarput.

Ilisarnaatit qalersannguilluunniit sungaartut ilisariuminartut paasititsiniaanermut imaluunniit imminut toqunnermit eqqugaasunik tapersersuinermut aamma ilisarnaataapput.

Imminut toqunnissamik eqqarsaateqartutut pissusilersortut eqqumaffigineqarnerunissaat pinaversaartitsiniarlunilu iliuusissanik annertunerusumik suliniuteqartoqarnissaa Paarisamit kaammattuutigaarput.

Paqumiginnikkunnaarnissaq pingaaruteqarpoq. Eqqarsartaatsikkuttaaq peqqinnerulernissaq anguniarlugu oqaloqatigiinnerunerup ammasuunerullu imminut toqunnissamik pinaversaartitsiniarluni suliniarnermi ilaatinissaat pingaaruteqarput.

Nunani allani qalersannguit sungaartut ersoqatigiinnermut imminullu toqunnermut akiuiniarluni sulinermi, nunarsuarmik pitsaanerusumik, inunnut ajornartorsiuteqartunut saaffiginniffissaqarfiusumik tapersersuiffiusumillu pilersitsinissamik neriuuteqarnermut ilisarnaataatigitinneqarput.

Inuiaqatigiit Yellow September-imut peqataanermikkut imminut toqunnissamik eqqarsaateqartut aamma eqqarsartaatsikkut ikiorneqartariaqartut paasineqarnissaat, tapersersorneqarnissaat nukissanilllu tunineqarnissaat suleqatigiissutigisinnaavaat.

• Yellow September-eqarnera siammarteruk
• Sungaartunik atisaqarit imaluunniit sungaartortalinnik pinnersaateqarit
• Yellow September aaqqissuussanut peqataagit
• Ilinnut, ilaquttatit, ikinngutitit suleqatilluunniit ilagalugit sungaartortalerlugu assiligitsi.

Nittartakkullu #YellowSeptemberKalaallitNunaat siammarterlugu.

Imminut toqunniarnermut eqqarsaatit pissusilersuutillu takuneqarsinnaapput, toqaannartumik oqaatiginerisigut imaluunniit toqqaannanngitsumik oqaatiginerisigut imaluunniit pissusilersornikkut. Ataatungaani takusinnaavatit oqaatsit pissusilersornernut assersuutit:

• Pissusilersornikkut allanngorneq, soorlu imminut mattunneq
• Kiserliorneq
• Pigisaminik agguaaniarluni pilersaaruteqarneq
• Imminnut soqutiginnginneq

• Ammasumik unneqqarissumillu oqaloqatigiuk
• Ikiorusullugu tapersersorusullugu neqeroorfigiuk
• Eqqartuunnaveersaaruk
• Eqqaamajuk inummik imminut toqunnissamik eqqarsaateqartumik pinaversaartitsiniarluni ikiuineq unamminarsinnaammat, taamaammat pingaaruteqarpoq tamakkuninnga suliaqartartunut attaveqarnissat, pingaartumik nalorniguit qanoq ajunnginnerpaamik ikiuussinnaanerlutit
• Ajornartorsiutaanik aaqqiiniarsarinak, kisianni tusarnaarit misigissusaalu akueralugit

• Tusaannga attavigisinnaavat sianerfissaq: 80 11 80 aamma sms: 1899

• Najukkassinni Peqqissaavik attavigiuk: peqqik.gl attaveqarfigiuk

• Politiit attavigisinnaavatit sianerfissaq: 70 14 48

• Ilaqutariit Illui

• Tarnip pissusaanik ilisimasalittut ilinniagaqarsimasut namminersortut

• Ilinniartunik siunnersuineq

• Allorfik aangajaarniutit imigassarlu atorlugit imminut toqunnissamik eqqarsaatit matussuserniarsarigaanni

Meeqqat, inuusuttut inersimasullu oqaloqateqarnissamik allaqateqarnissamilluunniit pisariaqartitsisut Tusaannga attavigisinnaavaat.
Tusaanngamut attaveqarneq kinaassutsimik isertuussiffiuvoq akeqarnanilu – aamma Tusassit imaqanngikkaluarpalluunniit sianersinnaavutit imaluunniit allallutit.
Tusaannga ullut tamaasa ulloq unnuarlu kaajallallugit ammasarpoq.

Oqarasuaat: 80 11 80

SMS: 18 99

• Soorlu plakaatit, quppersakkat, videot allallu suliaralugit angumerisinnaasagut.