Akuersineq

Akuersineq tunngaviusumik atoqatigiinnerup nammineq piumassuseq, toqqissisimaneq aamma ataqqinninneq aallaavigalugit pisarnissaanut, aamma tarnikkut imaluunniit timikkut pinngitsaalineqarnani pisarnissaanut tunngavoq. Toqqissisimasutut misigisimanissaq aamma iluarusunnissaq atoqatigiinnikkut misigisanut pitsaasunut tunngaviupput.

Akuersineq isumaqarpoq arlaannik pisoqarnissaanut akuersineq aamma akuersititsineq.

Assersuutigalugu inummut allamut tiingarusunneq imaluunniit atoqatiginnikkusunneq ersersinneqarsinnaavoq imaluunniit oqaatigineqarsinnaavoq.
Akuersineq ataatsimoorussamik akisussaaffiuvoq, aamma arlaannik isumaqatigiissuteqarsimanermut ersersitsineruvoq. Assersuutigalugu imaassinnaavoq illit tiingarusuttutit imaluunnit atoqateqarusuttutit. Imaluunniit illit paaserusukkit inuk alla taamaaliornissamut piumanersoq.

AKUERSISSUMMIK PISSARSINEQ

Inuk alla atoqatigerusukkaanni, taannali piumanersoq nalornissutigalugu, inuup taassuma killissaanik qaangiisoortoqarsinnaavoq.
Immitsinnut ersersinniakkatta imaluunniit timikkut oqariartuutitta paatsooqatigiissutiginerisigut taamatut pisoqarsinnaavoq.
Taamaattumik isumassarsiatsialaavoq ingerlaavartumik ilagisarlu qanoq ersersitseqatigiittarnerluni eqqumaffigissallugu, aamma atoqatigisat piumanersut qulakkeertassallugu.

Immitsinnut alaatsinaaffiginninnitsigut taamaaliorsinnaavugut. Assersuutigalugu ilagisap qanoq qissimittarnera, kiinaata qanoq isikkoqarnera, qanoq anersaartortarnera timinilu qanoq atortarneraa maluginiarneqarsinnaapput.
Misigisimagaanni ilagisap qanoq ersersitsineri malugisinnaanagit ima apersornissaa isumassarsiatsialaavoq: "Ajunngilatit? Imaaliornerput ajunngila?"

Immaqa ilagisaq aperalugu perusunnersoq, imaluunniit pineqartoq aperalugu sorusunnersoq, taamaaliorneq aamma tassaasinnaavoq tiingaqatigiinneq.

ANGERNERMUT- AAMMA NAAGGAARNERMUT ERSERSITSINERIT

Atoqatigerusutat tamatigut piumanersut aperisarnissaat isumassarsiatsialaavoq, imaluunniit nammineq sorusunnerluni oqaatigalugu ersersilluguluunniit.

Ilagisap qanoq qisuariartarnerata alaatsinaannissaa pingaaruteqarpoq. Imaassinnaavoq inuup taassuma isikkut isigigaatit nutsanilu imaluunniit kiinnani attorlugu, imaluunniit inuup taassuma talini paarlatsillugit inississimagai alarlunilu.

Ilaannikkut atoqatigiinnissamut naaggaarnissaq ajornakusoorsinnaasarpoq, ingammik siornatigut atoqatigeereersimagaanni imaluunniit tiingaqatigeereersimagaanni.
Nammineq piumanerluni ilagisalluunniit piumanera qularutigigaanni unikkallarnissaq isumassarsiatsialaasinnaavoq.

Illit akisussaaffigaat atoqatigerusutavit aamma illit atoqatigerusunneraatit qulakkiissallugu.
Inuk tiingaqatigisaq imaluunniit atoqatigisaq naaggaarpat pingaaruteqarpoq tamassuma pitsaasumik akuerinissaa.
Kikkut tamarmik namminneq timertik pillugu aamma atoqatigiinnikkut killissat pillugit aalajangiisinnaassuseqarput.
Taamaattumik allat timertik killissatillu pillugit aalajangiisinnaassuseqarnerat ataqqissallugu pingaaruteqarpoq.

Oqaatsit imaluunniit timi atorlugu tamanna ersersinneqarsinnaavoq.
Assersuutigalugu oqartoqarsinnaavoq "aap, piumavunga" imaluunniit "mm, nuannerpoq". Aamma qissiminnikkut, qungujunnikkut imaluunniit illarnikkut imaluunniit timip aalaasiisigut tamanna ersersinneqarsinnaavoq.
Assersuutigalugu inummut imaluunniit inunnut kajungerisanut tiinganissamut imaluunniit kinguaassiuutinut tunngasumik attavigiinnissamut ammaneq ersersinniarlugu timi taakkununnga attuutsinneqarsinnaavoq.

Inuk illit atoqatigerusutat ilisimanngippat, annilaanganermik qerattarluni nalappat imaluunniit ima aalakoortigippat illit inuk taanna oqaloqatigisinnaanagu, taava akuersineq pissarsiarineqarsimanngilaq. Taava nalunngilat iliuuseriniakkatit kukkunerusut.

Inuup imaluunniit inuit arlallit inuk alla akuersititsinertaqanngitsumik pinngitsaalillugu atoqatiniarsarippassuk imaluunniit kinguaassiuutitigut tunngasumik attuualaarniarsarippassuk tamanna kinguaassiuutitigut atornerluineruvoq. Kinguaassiuutitigut atornerluinerit inatsimmik unioqqutitsinerupput, aamma pillarneqaataasinnaapput.

Qaqugukkulluunniit akuersisimanerit atorunnaarsittarsinnaavat. Illimmi kisivit timit pillugu aamma sorusunnerlutit sorusunnginnerlutilluunniit aalajangiisinnaavutit.
Ilaannikkut atoqatigiinnissamut immaqa akuersisoqartarpoq, taavali paasilerlugu atoqatigiikkusugani.

Pisut ingerlanerini isumamik allanngortitsineq tamatigut ajunngitsuuvoq, aamma nassuiaateqarnissaq pisariaqanngilaq.

Imaassinnaavoq festernermi tiingaqateqarsimasutit imaluunniit kinguaassiuutinut tunngasumik arlaatigut attuumassuteqateqarsimasutit, qitittarfimmi imaluunniit festeqatigeereernerup kingorna angerlaqateqarsimasutit.

Kisianni imaanngilaq tiingaqateqarnikuugavit imaluunniit kunissugaqarnikuugavit imaluunniit angerlaqateqarnikuugavit atoqatigiinnissamut piumasutit. Illit kisivit illit timit sorusunnerlutillu pillugit aalajangiisussaavutit, aamma allat tamarmik timertik aamma kinguaassiuutitigut sorusunnerlutik aalajangiisinnaassuseqarfigaat.

Inummiit atoqateqarnissamut siornatigut akuerineqarsimagaanni, isumaqanngilaq piffimmi allami inuup taassuma atoqatiginissaanut akuersissutaasoq.

Najoqqutaq: sexlinien.dk

Tusaannga

Kiserliortutut misigaat oqaloqateqarnissamillu pisariaqartitsivit?
Kisimiinngilatit. Inuunerup ingerlanerani piffiit ilaanni, imaluunniit pissutsit misiginerat ima erloqinartigitillugit kisermaatissallugit sapilersillugit, inuit amerlanersaasa tusarnaarneqarnissartik pisariaqartittarpaat.

Tusarnaarnissamut piffissaqarpugut. Tusaanngap siunnersortai tusarnaartarput, unammilligassavillu oqaasinngortinnissaannut ikiuisinnaallutik. Aamma illit inuuninni pissutsit artornartut qanoq iliuuseqarfiginissaannut sakkussannik tunisinnaavaatsit.

Oqarasuaatikkut siunnersuisarneq tassaavoq kinaassutsimik isertuussilluni illit siunnersuisullu akunnissinni inuttut oqaloqatigiinneq, illit oqaloqatigiinnerup imarisassaasa suunissaannik aalajangiisuussallutit.

Meeqqat, inuusuttut inersimasullu tamarmik oqaloqateqarnissamik allaqateqarnissamilluunniit pisariaqartitsisut Tusaannga attavigisinnaavaat. Tusaanngamut attaveqarneq kinaassutsimik isertuussiffiuvoq akeqarnanilu – aamma Tusassit imaqanngikkaluarpalluunniit sianersinnaavutit imaluunniit allallutit.

Oqarasuaat: 80 11 80
SMS: 18 99

 

Politiit

Kinguaassiuutitigut atornerlunneqarneq misiginikuuiuk?
Atornerlunneqarsimaneq pillugu arlaannik oqaloqateqarnissaq ajornakusoorsinnaavoq, tamannalu nalinginnaaqaaq. Taamaaliornissalli ilinnut pingaaruteqarpoq.
Kinguaassiuutitigut atornerlunneqarneq misiginikuuiuk?
Arlaata illit nuannarinngisannik attuuasarpatit, imaluunniit illit piumanngikkaluartutit arlaata atoqatigisarpatit tamanna tassaavoq pinerluttuliorneq sakkortooq, illit uagutsinnut nalunaarutigisassat.

Tamanna ajornakusoorsinnaasarpoq, pissutigalugu atornerlunneqareernerup kingorna apeqquterpassuit takkussuussinnaasarmata. Illit arlaannut oqaaseqarnissannut nangaaninni immaqa peqqutit ukua arlaat ilisarisinnaavatit:

• Kanngusuttutut misigaatit imaluunniit taamaattoqanngilluinnaraluartoq isumaqarputit nammineq pisuusimallutit
• Imaassinnaavoq pinerluttuliortoq ilisarisimavat, taamaammallu uagutsinnut saaffiginninnissat immikkut ittumik ajornakusoortillugu
• Pisimasut kukkunerunersut imaluunniit unioqqutitsinerunersut qularutigaat
• Suut tamaasa puiorusunneruatit
• Atornerluisimaneq pillugu nalunaarutiginnikkuit pinerluttuliortumut imaluunniit ilinnut qanoq kinguneqassanera qularutigaat
• Imaassinnaavoq qanorpiaq pisoqarsimanera pillugu qularuteqartutit, aamma imaassinnaavoq suut tamaasa eqqaamanngikkitit
• Imaassinnaavoq uagutsinni politiini qanoq pisoqartarnera pillugu qularuteqartutit aamma annilaangasutit Pisimasup eqqarsaatigeqqinnissaa aamma qanoq pisoqarsimaneranik nassuiaanissaq sakkortusinnaapput
• Tusarsimavat uagutsinnik oqaloqateqarneq nuanniissinnaasoq
• Atornerluineq pillugu oqaluttuaruit allat qanoq qisuariassanersut annilaanngatigisinnaavat. Kamalissappat? Aliatsassappat? Upperivaatsit?
• Inuk ilinnik atornerluisimasoq annilaanganaraat

 

Inersimasumik oqaloqateqarit
Kinguaassiuutitigut atornerlunneqarsimaguit inersimasumik toqqissisimanarisamik oqaloqateqarneq iluaqutaagajuttarpoq. Misigisimasatit kisermaateqinagit - kisermaakkukkit oqinnerulernavianngilaq.

Politiinut nalunaarutiginninneq ulorianarpasissinnaavoq - ilumoortumilli taamaanngilaq. Inersimasumik oqaloqateqaruit inuup taassuma aamma politiinik oqaloqateqarnissannik ikiorsinnaavaatit.

Nammineerlutit aamma una normu atorlugu politiinut sianersinnaavutit 70 1448.
Illoqarfigisat politeeqarfeqarpat imaluunniit nunaqarfinni kommunefogedeqarpat taakkua sukkulluunniit ornillugit oqaloqatiginissaannut tikilluaqqusaavutit.