airplanebooksbriefcase business cogs cross election entertainment fish house law lockmedicalpeopleselfservices socialtax

Ujaruk

27. maj 2021

Kinguaassiutinut tunngasunik ilinniartitsinissamut ilinniartitsissutissat nutaat

Paarisa Isumaginninnermut Aqutsisoqarfimmi immikkoortortaasoq, meeqqat atuarfianni atuartut angajulliit kinguaassiutinut tunngasunik ilinniartitsisoqartarneranik ilinniartitsissutissanik ineriartortitsiniarluni, Sex og Samfundi isumaqatigiissuteqarfigisimavaa.


Videot, apersuinerit workshopertitsinerillu aqqutigalugit inuusuttut ilinniartitsinissamut pingaarnertut inissisimasut atortunik suliarinninnermi ineriartortitsinissamut ilanngunneqassapput.

Paarisa

Atoqateqartarnikkut peqqissuuneq inuunerup qanoq issusianut atugarissaarnermullu aalajangiisuusarpoq aamma kinguaassiutinut tunngasunik ilinniartitsineq pinaveersaartitsinermut peqqissutsimullu iluaqutaasussanut pingaaruteqarpoq.

Inatsisit malillugit angajulliit (8-10. klassit) atoqateqartarnikkut peqqissuunermik ilinniartinneqartassapput. Kinguaassiutinut tunngasunik ilinniartitsinermi atortut ilinniartitsisuniit nuna tamakkerlugu apersuutigineqangaatsiarsimapput. Tamanna tunngavigalugu ilinniartitsissutissanik nutaanik ineriartortitsinissamut suliniut aallartisarneqarpoq.

Sex og Samfundi danskit suliniaqatigiiffiutigaat, inuit tamarmik namminneq timiminnik kinguaassiuutitigut piumassuseqarnerup qanoq issusiannillu (seksualitet) aalajangiisinnaanissaannut, naligiimmik pisinnaatitaaffeqarnissaannik sorsuuteqartoq. Sex og Samfundi sumiiffimmi najukkami, nunarsuarlu tamakkerlugu suliaqartuuvoq, ilaatigullu danskit norskillu meeqqat atuarfiannut ilinniartitsissutissanik ineriartortitsisimasoq. Paarisa suleqatigalugu meeqqat atuarfiinut nutaamik ilinniartitsissuteqarnissamik ineriartortitsisoqarnissaa matumani immikkut ilisimasaq pingaaruteqarpoq.

Ilinniartitsissutissap siunertaraa inuusuttut akornanni atoqateqartarnikkut peqqissuuneq siuarsarneqarnissaa. Suliap ingerlanerani inunnik ilinniarsimasunik ilanngullattaartussanik qanimut oqaloqatigiinnikkut atortut suliarineqassapput. Tamanna atatillugu ullormi 28. aprilimi workshopertitsisoqarpoq tassanilu nuna tamakkerlugu inuit ilinniarsimasut 15-it peqataapput. Videot, apersuinerit workshopertitsinerillu aqqutigalugit inuusuttut ilinniartitsinissamut pingaarnertut inissisimasut atortunik suliarinninnermi ineriartortitsinissamut ilanngunneqassapput.

Ilinniartitsissutissat innuttaasut peqqissuunissaannut Inuuneritta III, meeqqat inuusuttullu tamarmik inuunerinnissaannik anguniagaqartoq kiisalu Killiliisa, meeqqanut inuusuttunullu kinguaassiutitigut atornerluinerni amerlassusiinik ikilisaanissamik kissaateqartoq, aallaavigai. Ukioq 2022 naalernerani ilinniartitsissutissat naammassineqarnissaat naatsersuutigineqarpoq.

Attaveqarfissaq
Paasisaqarnerorusukkuit Karo Thomsen Fleischer Paarisami suliassanik aqutsisoq attavigiuk ugguuna e-mail, katf@nanoq.gl imaluunniit oqarasuaat: 346613