Avannaata Kommuniani imminut toqunnissamut pinaversaartitsisut nutaat
2022-imi Paarisap, Kalaallit Nunaanni inuttaasut peqqissusiannik ilisimatusarfiup aamma Avannaata Kommuniata akornanni suleqatigiinnerisigut imminut toqunnissaq pillugu pitsaaliuinermut pikkorissaasartut nutaat ilinniagartik naammassivaat.
Ilitsersuisartussat ilinniartinneqarnerini kommunit najukkami imminut toqunnissaq pillugu pitsaaliuinissamut namminneq pikkorissaasinnaalernissaat qulakkeerneqassaaq. Pikkorissaasarnerni siunertaavoq pikkorissartut imminnut toqunnissaminnut ulorianartorsiuteqartut pissusilersortarnermikkut ersiutaannik takunnissinnaalersinneqassasut aamma imminut toqunnissaminut ulorianartorsiuteqartup oqaloqatiginissaanut ajornakusoorsinnaasumik isumaginnissinnaanissaminut piginnaanngorsarneqassasut.
Tamatuma inerneraa Avannaata Kommunia maanna namminersorluinnarluni pingasoriarluni imminut toqunnissaq pillugu pitsaaliuinissaq pillugu pikkorissaatitsisimammat. Pikkorissaaneq maajip tallimaanit arfineq-aappaat ilanngullugu nunaqarfimmi Kullorsuarmi ingerlanneqarnikuuvoq, avannaani sumiiffinniit assigiinngitsuniit inuit katillutik 16-init najuuffigineqarsimasoq. Peqataasut tamarmik ulluinnarni meeqqanik inuusuttunillu sullitaqartuupput.
Pikkorissarnikut nutaat imminnut toqunnissaminnut ulorianartorsiuteqartut pissusilersortarnerini ersiutinik takunnissinnaalissamut ilinniartinneqarput aamma oqaloqatiginninneq aqqutigalugu taamatut pissusilersortarnerup qisuariarfigisarnissaanut atorsinnaasaminnik pissarsisimallutik.
Tusaannga
Imminut toqunnissamik eqqarsaateqaraanni imaluunniit kisimiittutut misigigaanni kinaassuseq isertuullugu 801180-imut sianerluni imaluunniit 1899-imut sms-erluni Tusaannga attavigineqarsinnaavoq akeqanngitsumillu siunnersortimik oqaloqateqartoqarsinnaalluni.Tusaannga ullut tamaasa ulloq unnuarlu kaajallallugit ammasarpoq.