Imminut toqunnissamik pinaveersaartitsineq pillugu ilitsersuisunik nutaanik ilinniartitsineq
Imminut toqunnissaq pinaveersaartinniarlugu eqimattat nutaat ilitsersuisutut ilinniarlutik marlunngornermi januarip ulluisa 30-ani aallartissimapput.
Paarisap, Kalaallit Nunaanni Innuttaasut Peqqissusaannik Ilisimatusarfiup (KNIPI) aamma Danmarkimi Livslinjenip suleqatigiinnerisigut imminut toqunnissamik pinaveersaartitsinermi ilitsersuisutut ilinniarnissamik aallartitsisinnaasimapput. Ilinniaqatigiittussat 17-iusut ulluinnarni kommunini sulisunit, Tusaanngamiit aamma Kalaallit Nunaanni Innuttaasut Peqqissusaannik Ilisimatusarfimmi sulisunit peqataaffigineqarpoq.
Nuna tamakkerlugu imminut toqunnissap pinaveersaartinneqarnerani periusissiami 2013-imiit 2019-imut ilitsersuisutut ilinniartitaaneq aallartinneqarpoq periusissiamilu Qamanimi - imminut toquttarnerup pinaveersaartinneqarneranut periusissiap 2023-mit 2028-mut atuuttup ataani nanginneqarluni.
Ilinniartitaaneq Arnârak Patricia Bloch-imit inerisarneqarpoq. Ilinniartitaaneq KNIPI-p suleriusia aallaavigalugu Paarisa suleqatigineratigut kalaalliit kulturiannut Arnâqqamit naleqqussarneqarsimavoq.
Ilitsersuisutut ilinniartitaaneq Kalaallit Nunaanni misissueqqaarnermik aamma atuagarsornermik kiisalu Livslinjen-imit imminut toquttarneq pillugu immikkut ilisimasanik misilittakkaniillu tunngaveqarpoq.
Iitsersuisutut ilinniartitaanerup ilitsersuisussat makkunannga ilikkagaqarnissaat siunertaavoq:
• Imminut toqunissamut pinaveersaartitsineq pillugu ilisimasat, imminut toqunnissamut aarlerinartorsiortut qanoq pissusilersortarneri pillugit ilisimasat ilanngullugit.
• Inuit sooq imminnut toqullutik toqukkut qimaguttarnerannik atuagarsorluni ilisimasat.
• Imminut toqunnissamik navianartorsiortunik aamma imminut toqoratarsinnaasunik nalilersuinermi atortut aalajangersimasut atorlugit takunnissinnaalerneq.
• Aarlerinartorsiortitsisartut aamma illersuutaasartut pillugit ilisimasat.
• Inuit imminut toqunissamik eqqarsaatillit, inunnik imminut toqoriarsimasunut qanigisaasut aamma imminut toqussimasunut qanigisaasut oqaloqatiginissaannut oqaloqatiginneriaatsinik paasissutissiisinnaaneq.
• Toqqissisimasumik imminullu illersorneqarsinnaasumik imminut toqunnissamut pinaveersaartinnissaanut qanoq oqaloqateqarsinnaanermik kiisalu iliuuseqarnissamut periarfissat suunerinik ilisimasat.
Ilitsersuisut ilinniartitaareerunik imminut toqunissamik pinaveersaartinneqarnissaanik, sulisunut sammitinneqartunik, pikkorissaasinnaalissapput. Ilitsersuisunngorumaartussat 2024-mi maajip qaammataata aallartinnerani ilinniarnerminnik naammassissangatinneqarput.
Attavissaq
Paasissutissanik annertunerusunik pissarsiniaruit Paarisa mail-ianut uunga paarisa@nanoq.gl allassinnaavutit imaluunniiit oqarasuaat una 34 50 00 atorlugu sianersinnaavutit.