Kattulluta Inuuneritta aarsrapport 2023

Niuertarfiit ulluinnarni imminnut unammilleqatigiikkaluarlutik, suleqatigiinnermi Kattulluta Inuunerittami inuunerissaarnissamik ataatsimut anguniagaqarnissamut suleqatigiinniarlutik isumaqatigiissuteqarsimapput. Inuunerissaarneq ulluinnarni inuunermi oqimaaqatigiissitsilernissamut kiisalu imminut allanullu iluarinninnermik tunngassuteqarpoq. Nerisagut imikkagullu nerinermilu ataatsimoorneq peqqissusitsinnut atugarissaarnitsinnullu isumalerujussuupput.

Suleqatigiinneq Kattulluta Inuuneritta

Suleqatigiinnermi 2023-mi killiffiit maanna ukiumoortumik nalunaarusiami saqqummiussami nalilersorneqarput, tassanilu takuneqarsinnaavoq suliniarneq maannamut angusaqarfiusimasoq. Ukiumoortumik nalunaarusiaq 2022-mi ukiumoortumik nalunaarusiamut ilassutaavoq, tassani 2023-mi angusat 2024-mullu anguniakkat ukkataralutigit.

Iliuuserineqartut ilumut iluaqutaanissaat qulakkeerniarlugu suliniutit aallartinneqartut uuttortarneqarnissaat suleqatigiinnitsinni aalajangiisuuvoq. Suleqatigiit anguniakkat piviusut uuttortarneqarsinnaasut, atuisartut peqataanerisigut innuttaasut peqqissusaannik inuunerissaarneranillu siuarsaaqataasinnaasut, ukiut tamaasa taamaammat toqqartarpaat.

2023-mi paarnat naatitallu qerisut nutaallu kiisalu nioqqutissat matuersaaserfimmik ilisarnaatillit tunisaanerisa siuarsarneqarnissaat anguniarneqarpoq. Peqataasut akornanni suleqatigiinnikkut paarnanik naatitanillu qerisunik tunisaqarnermi 2022-mi angusarissaarnerput, ilaatigut kvartalit pingajuanni tunisat 5 %-imik annertunerulernerat, attassinnaasimavarput. Paarnanik naatitanillu nutaanik tunisaqarneq ukiumut ataatsimut kisitsisini 1 %-imik qaffariarsimavoq, kvartalilli aappaanni 7 %-imik qaffariarsimalluni. Tamatuma ataatsimut anguniagaqarluni suleqatigiinnikkut angusaqarluartoqarsinnaasoq takutippaa, tamannalu suleqatigiinnermi tulluusimaarutigaarput.

Nioqqutissanik peqqinnartunik matuersaaserfimmik ilisarnaatilinnik tunisaqarnerup annertusinissaa suleqatigiinni aamma sulissutigisimavarput. Tamatumani kisitsisit katinneranni 102 anguarput, ilutigitillugulu ilisarnaatip atuisartunit ilisimaneqarnerulernissaa sulissutigisimallutigu. Atuisartunik 2023-mi misissuinitsinnit akissutini takusinnaavarput 47 %-it matuersaaserfimmik ilisarnaat qanorlu isumaqartoq ilisimallugu akissuteqarsimasut. Atuisartunik misissuinermi nuna tamakkerlugu akissutit 590-iusimapput. Taamak amerlatigisut peqataarusussimammata nuannaarutigaarput, atuisartummi perusunnerusaat pisiniariaasiilu pillugit ilisimasaqarnissamut tunngavissaqarnerulissagatta.

Niuertarfiit peqataasut tamarmik immikkut tunisat amerlassusaat kisitsisillu nalunaarsukkat nalunaarutigisarpaat, taakkulu suleqatigiit anguniakkanik angusaqassanerannik uuttortaatitut atorneqartarlutik, kiisalu ilisimasanik nutaanik pingaarutilinnillu ilanngussaqartarlutik. Suleqatigiinni taamaammat niuertarfiuteqatigiinni pingasuni nioqqutissaqatigiiaat sorliit tunisaanerpaanerannik ataatsimoortumik Tunisaanerpaat 30-nik saqqummiussisinnaavut. Allattorsimaffimmi tassani immiaaqqat sodavandillu suli tunisaanerpaapput, soorlu aamma tupat, sunoorsit imeruersaatillu nukimmik akullit allattorsimaffimmi qullasissumiillutik. 2022-misulli kisianni erseqqissaatigineqassaaq paarnat naatitallu allattorsimaffimmiimmata – ukioq manna normu 4-tut 9-tullu. Nioqqutissat peqqinnartut amerlassusaasa siuarsarneqarnissaanik suliaqarnissap pingaaruteqassusaanik Tunisaanerpaat 30 matuma naqissuserpaa.

Suleqatigiinnermi 2024-mut anguniakkat pitsanngorsarneqarsinnaasutut isigisatsinnik aallaaveqarput:

2023-mi anguniakkat tulliuttut ingerlateqqinnissaat:
• Paarnanik naatitanillu qerisunik tunisaqarnerup annertusinissaa.
• Paarnanik naatitanillu nutaanik tunisaqarnerup annertusinissaa.
• Nioqqutissanik annikinnerusumik peqqinnarnerusumillu orsulinnik, sukkukinnerusunik tarajukinnerusunillu, nerisani fibereqarnerusunik aserorterneqanngitsunillu karritaqarnerusunik matuersaaserfimmik ilisarnaasikkanik tunisaqarnerup annertusinissaa.
• Tunineqarnerpaat 30-t akornanni nioqqutissat peqqinnartut amerlinissaat.
• Suleqatigiinnermik suleqatigiinnerullu ilisarnaataanik ilisimasaqarnerup annertusinissaa.

Kiisalu imeruersaatinik imigassartaqanngitsunik tunisaqarnerulernissamik anguniagaqarnissap aallartinnissaa.

Kattulluta Inuunerittamik suleqatigiinneq 2030-p tungaanut ingerlassaaq Naalagaaffiit Peqatigiinni Nunarsuarmut anguniakkamik 3-mik: Peqqissuseq atugarissaarnerlu aamma Nunarsuarmut anguniakkamik 17-imik: Iliuuseqarnissamut suleqatigiinnermik aallaaveqarluni.

www.paarisa.gl-imi  Kattulluta Inuunerittap 2023-mut ukiumoortumik nalunaarusiaa atuarneqarsinnaavoq. 


ATTAVISSAT

Paasisaqarnerunissamut attavissat:

Paarisa:
Paarisami immikkoortortami pisortaq, Helena Lynge Møller oqarasuaat +299 34 57 05 imaluunniit e-mail: helm@nanoq.gl

Brugseni:
Nittarsaassinermut attaveqaqatigiinnermullu pisortaq Benny Reffeldt Otte oqarasuaat +299 52 63 39 imaluunniit e-mail: benny.otte@knbmarketing.gl

KNI/Pilersuisoq:
Nittarsaassinermut pisortaq Anders Steenbakken oqarasuaat +299 55 15 77 imaluunniit e-mail: atb@kni.gl

Pisiffik:
Nunarsuarmut anguniakkamik Tina Hansen oqarasuaat +299 29 66 30 imaluunniit e-mail: tih@pisiffik.gl