Suliffeqarfiit meeqqat peqqissuunissaannut pisinnaatitaafiinullu tapersersuipput
Paarisa, UNICEF, Brugseni, Pilersuisoq, Pisiffik Royal Greenland-ilu, kingumut ukioq manna 2024-imi, atuartut IGASA qulequtsiullugu nuna tamakkerlu ataatsimoorlutik nuannersumik pissarsiffiulluartumillu peqqinnartunik igaqatigiinnissaannut periarfissiipput.
Nerisassat peqqinnartut, ataatsimoorneq meeqqallu pisinnaatitaaffii. Taakku Paarisap UNICEF-illu Kalaallit Nunaanni allaffeqarfiata, ukioq manna kingumut nuna tamakkerlugu IGASA qulequtsiullugu atuartunik igaqatigiissitsinerannut, qulequtaapput. Tamanna pissaaq novembarip ulluisa aallaqqaataanni.
Ukioq manna pisarnertut Brugseni, Pilersuisoq, Pisiffik Royal Greenlandilu, nerisassiassanik- meeqqat peqqinnartunik igalerunik atugassaannik tamanik tunisinikkut suliniummut tapersersuisuupput. Tamatuma peqatigisaanik ataatsimoorneq meeqqallu pisinnaatitaaffii, atuartut ilinniassavaat.
”Brugseni, Pilersuisoq, Pisiffik Royal Greenlandilu, ullormi pisussanut tapersiinerannut, nerisassiassanik aalisakkanillu, iggavimmi peqqinnartunik pitsaasunillu nerisassiornissamut meeqqanut periarfissiisunik tunissuteqarnerannut qutsavigingaarpagut. Suliffeqarfiit taakku taamaalillutik meeqqat peqqisuunissaannut pisinnaatitaaffiinullu tunngatillugu akisussaaffimmik annertuumik takutitsipput,” Paarisami immikkoortortami pisortaq, Helena Lynge Møller oqarpoq.
UNICEF-ip Kalaallit Nunaanni allaffeqarfianit suliffeqarfiit qutsavigineqarputtaaq:
”Meeqqat pisinnaatitaaffiinik pingaartumik meeqqat pisinnaatitaaffii pillugit isumaqatigiissummi artikel 24-imut; inuit kikkulluunniit timikkut tarnikkullu peqqissusissatut anguneqarsinnaasumik annerpaamik meeqqat pisinnaatitaaffeqarnerannut tunngassuteqartup pineqarnerani, suliffeqarfiit ukkasseqataanerat akisussaaffimmillu tigusinerat nuannaarutigeqaarput” Tina Dam, UNICEFip Kalaallit Nunaanni allaffeqarfiani suliniutinut pisortaq oqarpoq.
IGASA suliniutaavoq aaqqissuussaanikkut ”Inuuneritta III –ip 2020-imiit 2030-imut Naalakkersuisut meeqqat inuunerinnerulernissaat pillugu suleqatigiinnissaq siunertaralugu periusissiaata” ataani inissisimasoq. IGASA qulequtsiullugu ullormi, meeqqat nuna tamakkerlugu atuarfinni atuartunut akullernut; nerisassiorneq, peqqinneq, ataatsimoorneq meeqqallu pisinnaatitaaffii qitiutillugit suleqatigiissuteqartinneqartarput.
IGASA 2024 pillugu paasissutissat
Ukioq manna atuartut 467-it illoqarfinni qulaaluani nunaqarfinnilu 14-ini atuarfinnit 27-ineersut nuna tamakkerlugu IGASA-mi peqataassapput.
Annertunerusunik paasissutissinneqarusukkuit attavissatit tassaapput:
Paarisa: Immikkoortortami pisortaq Helena Lynge Møller oqarasuaat: 34 57 05, e-maili: helm@nanoq.gl
UNICEF: Suliniutinut pisortaq Tina Dam oqarasuaat: 27 35 52, e-maili: tdam@unicef.dk
Brugseni: Nittarsaassinermi attaveqatigiinnermilu pisortaq Benny Reffeldt Otte oqarasuaat: 52 63 39, e-maili: benny.otte@knbmarketing.gl
KNI/Pilersuisoq: Piujuartitsinissamut ataqatigiissaarisoq Nukappiannguaq Olsen oqarasuaat: 86 23 71, e-mail: nqx@kni.gl
Pisiffik: Nittarsaassinermi pisortaq Tina Hansen oqarasuaat: 29 66 30, e-maili: tih@pisiffik.gl