Killiliisa – innuttaasunut
Kinguaassiuutitigut innarliisarnerit akiornissaannut suliniuteqarneq nukittorsarniarlugu innuttaasunut ilitsersuut nutaaq kinguaassiuutitigut innarliisoqartarnerani meeqqat inuusuttullu tapersersornissaannut inersimasunut tapersersuisussanut ajornannginnerulersitsisussaq ilitsersuut nutaaq "Killiliisa – innuttaasunut" Paarisap februaarip 13-ianni 2025-mi saqqummersippaa
Ilitsersuut nutaaq "Meeqqanik kinguaassiuutitigut atornerluineq pillugu ilinniagalinnut najoqqutassiaq" 2019-imi saqqummersinneqaqqaartoq najoqqutaralugu paasiuminarnerusumik pissarsiariuminarnerusumillu suliarineqarpoq. Innuttaasut annertuumik soqutiginninnerat tunngavigalugu saqqummersinneqartoq nutaaq inunnut 18-ileereersimasunut, qulequttat imaannaanngitsut taakkua iliuuseqarfiginissaannut ilisimasaqalerusuttunut sakkussaqarusuttunullu siunnerfeqartinneqarpoq.
Imarisai sunniuteqartussat
Uani "Killiliisa – innuttaasunut" ilaatigut makkua atuarneqarsinnaapput:
- Oqartussat qanoq nalunaarfigineqassanersut.
- Meeqqat inuusuttullu tapersersornissaannut iliuusissat.
- Qarasaasiatigut kinguaassiuutitigut innarliisarnerit.
2025-mi februaarimi saqqummersinneqassaaq
Ilitsersuut februaarip 17-iat 2025 aallarnerfigalugu uani www.paarisa.gl pissarsiarineqarsinnaalissaaq. Atuaganngorlugu perusunnerugaanni taanna Paarisamut attaveqarnikkut inniminnerneqarsinnaavoq uunga allalluni paarisa@nanoq.gl.
Paarisami immikkoortortaqarfimmi pisortap Helena Lynge Møller oqaaseqaataa:
Innuttaasunut tamaginnut tapersersuineq pingaaruteqartoq
"Meeqqat inuusuttullu kinguaassiuutitigut innarligaannginnissaannut illersuinissamut innuttaasut tamarmik ilisimasanik sakkussanillu pisariaqartunik pissarsisinnaanissaannik qulakkeeriniarluta sulinitsinni ilitsersuut taanna alloriarneruvoq pingaaruteqartoq.Killiliisa – innuttaasunoortup saqqummersinneqarneratigut akisussaaffimmik tigusinissarput iliuuseqarnissarpullu ajornannginnerulersipparput."
Paasissutissanik annertunerusunik piniaruit Paarisap email-ianut allassinnaavutit uunga: paarisa@nanoq.gl