Yellow September: Imminut toqunnissamik pinaveersaartitsineq nunatsinnik ataatsimoortitsivoq
Paasititsiniaaneq Yellow September imminut toqunnissamut pinaveersaartitsinermik soqutiginninnerulersitsissaaq. Nunatsinni sumiiffinni arlalinni septembari tamakkerlugu sumiiffinni paasititsiniaanermit aaqqissuussinerit ingerlanneqassapput.
Paarisap nunatsinni 2024-mi Yellow September siullermeertumik saqqummiuppaa. Ukioq manna Qamani – imminut toqunnissamik pinaveersaartitsineq pillugu periusissiaq 2023-2028-p atulersinneqarnerata ilaattut paasititsiniaaneq ingerlanneqaqqissaaq.
Peqataanissamut soqutiginninneq ukiumut kingullermut naleqqiullugu soqutigineqarneruvoq, ukiorlu manna sumiiffinni aaqqissuussinerit ingerlanneqarnissaannut Paarisap imminut toqunnissamik pinaveersaartitsinermut aningaasaliissutigisartagaanit sineriammiit qinnuteqartut 23-t tapiissutinik tunineqarsimapput. Aaqqissuussinerit ataatsimoornernik nukittorsaassapput, eqqarsartaatsikkut peqqissuseq pillugu oqallinnernik pilersitsillutik aamma ikiorneqarnissamut tapersersorneqarnissamullu periarfissanik erseqqinnerulersitsissapput.
Nuna tamakkerlugu tapersersuisoqarnissaa naatsorsuutigineqarpoq, paasititsiniaanerup malunnartinnissaanut pisiniarfiit, cafét najukkamilu inuiaqatigiit tapersiissapput. Yellow Septemberip ilisarnaataa, qalersaq sungaartoq, ukioq manna nuna tamakkerlugu pissarsiarineqarsinnaalernissaanut Paarisap Brugseni, Pisiffik aamma Pilersuisoq suleqatigai.
Yellow September nunarsuatsinni malunnartinniarneqartarpoq qalipaallu sungaartoq qaamanermut, qiimanermut neriuuteqarnermullu atassuserneqartarpoq. Nunatsinnittaaq aamma imminut toquttarnerup pinaveersaartinniarneqarnerani ataatsimoornissap pingaaruteqassusaa qalipaammit sungaartumit naqissuserneqassaaq.
Paarisa Facebookikkut ilisimasanik, oqaluttuanik nutarterinernillu saqqummiussisassaaq. Peqatigisaanik ikiorneqarsinnaanermik kisimiinnginnermillu oqariartuuteqarnerup siammarternissaanut inuit ilisimaneqarluartut suleqatigisartakkallu assigiinngitsut tamatuminnga ikiuutissapput.
Yellow September aamma periusissiaq Qamani pillugit uani annertunerusumik paasisaqarsinnaavutit www.paarisa.gl
Imminut toqunnissamik eqqarsaateqaruit imaluunniit kiserliortutut misigisimaguit Tusaannga attaveqarfigisinnaavat.
Tusaannga ulloq unnuarlu ammasarpoq, kinaassutsimik isertuussiviullunilu akeqanngilaq.
Oqarasuaat: 801180
SMS: 1899
Sukumiisumik paasisaqarusukkuit naalakkersuisup allattaa Cecilie Nørgaard e-mailikkut ceno@nanoq.gl imaluunniit oqarasuaatikkut: +299 34 50 00 attavigiuk.