Tusaanngap ammarsarfii nutaat

Tusaannga oqarasuaat 801180-ikkut imaluunniit 1899-imut SMS-ernikkut attavigineqarsinnaavoq.

”Naalakkersuisut kissaatigaat ammasarfiit nutaat sivitsukkallu Tusaanngap sianerfiginissaannut ajornannginnerulersitseqqissasoq. Neriuppunga kikkut tamarmik ajornartorsiutit pillugit eqqartuinissaminnut pisariaqartitsisut Tusaanngamut sianerusuttassasut.  Tusaannga tassaavoq kinaassutsimik isertuussilluni oqarasuaatikkut inersimasunut meeqqanullu ajornartorsiutiminnik eqqartuinissaminnut amigaateqartunut siunnersuisarfik. Avannaaninngaanneeraluaruilluunniit, kujataaninngaanneeraluaruilluunniit, tunuminngaanneeraluaruilluunniit imaluunniit kitaaninngaanneeraluaruit Tusaanngamut akeqanngitsumik sianersinnaavutit SMS-erlutilluunniit aamma nunaqarfimmiikkaluaruit illoqarfimmiikkaluaruilluunniit ” Isumaginninnermut, Ilaqutariinnut Inatsisinillu Atuutsitsinermut Naalakkersuisoq Martha Abelsen oqarpoq. 

Ullumikkut Tusaannga ullut tamaasa ulloq unnuarlu attavigineqarsinnaavoq.  Marsimili meeqqat coronavirus pillugu ernumassuteqartut Tusaanngamut ullut tamaasa aamma attaveqarsinnaasimapput. 

Innuttaasunut inersimasuugaluarpata meeraappataluunniit, nalunngisaminnit imaluunniit illoqarfimminni/nunaqarfimminni ikiorserneqarsinnaannginnermik misigisimasunut ajornartorsiumminnik oqaloqatiginninnissamut pisariaqartitsisunut Tusaannga neqeroorutaavoq.   Aamma innuttaasut ajornartorsiutitik pillugit ikiorneqarnissaminnut siunnersorneqarnissaminnullu saaffiginniffissaannut Tusaannga innersuussisinnaavoq.

Tusaannga januaari 2019-imi ammarmalli saaffiginnittut katillugit 2.634-usimapput.   Tamanna agguaqatigiissillugu ullormut saaffiginnittut 5-6-iupput, qaammatillu tamaasa saaffiginnittut 164-it missaaniittarlutik.  Ukiukkut taarsiorfiup nalaani saaffiginnittut aasamut naleqqiullugu amerlanerusarput.


Attaveqarfissaq
Paasisaqarnerorusukkuit naalakkersuisup allattaa Inger Heilmann Larsen e-mail: ihla@nanoq.gl imaluunniit oqa. +299 554160 aqqutigalugit attavigiuk.