Imminut toqunnissamik pinaversaartitsineq

Erngertumik navianartorsioruit ingerlaannarluunniit ikiorneqarnissamik pisariaqartitsiguit politiit uunga attavigikkit 70 14 48 imaluunniit najukkanni peqqinnissaqarfiliarlutit.

Imminut toqunnissamik eqqarsaatit pissuteqarput amerlasuutigullu suliarinissaat pisariaqartinneqartarluni. Ikiortissarsiornissaq taamaammat pingaaruteqarpoq.

Pikkorissunit ukunani ikiorneqarsinnaavutit:

• Tusaannga – kinaaninnik isertuussillutit attaveqarsinnaavutit uunga sianerlutit: 80 11 80, imaluunniit 18 99-imut SMS-erlutit imaluunniit nittartagaat Tusaannga.gl alakkarterlugu
• Najukkanni peqqinnissaqarfik
• Kommuninni isumaginnittoqarfik
• Najukkanni palasi
• Tarnip pissusaanik ilisimasallit namminersortut

Pitsaanerulernissannut alloriaqqaarit

Pitsaanerulernissamut alloriaqqaarneq ilinnut isumalimmik iliuuseqarneruvoq. Qaqugukkut iluatannerpaasarnerlutit paasiniaruk – pinngortitamiissinnaavoq, ikinngutit ilaquttalluunniit ilagalugit, suliffimmi atuarfimmiluunniit.

Oqaloqateqarnissaq sapernartutut ippat eqqarsaativit allattoqqaarnissaat iluaqutaasinnaavoq. Qanoq innerlutit inummut ataatsimut tatigisannut oqaluttuarlutit aamma aallartissinnaavutit.

Isumaliortaatsikkut  peqqissuunerit pitsanngorsarsinnaavat isumaliortaatsikkut peqqissuunermut ABC-mit siunnersuutit malinnerisigut:

• Act – Iliuuseqarit!
• Belong – Allat peqatigalugit sammisaqarit!
• Commit – Isumaqartitannik suliaqarit!

Act – Iliuuseqarit

Ilisimatusarnerit takutippaat inuit timikkut, isumaliortaatsikkut, inooqataanikkut anersaakkullu uummaarissumik inuuneqartut isumaliortaatsimikkut peqqissuunerusartut. Suliaqartilluta nuannaarnerusarpugut ulluinnarnilu qaangerniagassanik isumaginninnissamut nukissaqarnerulluta. Pinngortitamiinneq, kisimiilluni allanillu peqateqarluni, isumaliortaatsitta pitsaasuunissaanut immikkuullarissumik iluaqutaavoq.

Belong – Allat peqatigalugit sammisaqarit

Isumaliortaatsivit peqqissuunissaanut ataatsimoornermut atasutut peqataasutullu misiginissat pingaaruteqarpoq. Sulianut peqataaguit inunnik nutaanik ilikkagaqarnissamut ataatsimoornermullu peqataalernissamut periarfissatit annertunerulissapput. Inooqataanermi attaveqaatitit pitsaanerujartortillugit inuunermi qaangerniagassanik isumaginnillaqqinnerulissaatit.

Commit – Isumaqartitannik suliaqarit

Anguniagassalernissaq angunissaallu, qanorluunniit annikitsuinnaagaluarpat, naammassisaqarsimasutut misigilersitsisarpoq. Allanik ikiuiguit ataatsimoornermullu iluaqutaallutit, assersuutigalugu nammineq kajumissutsimik suliaqarnikkut, inuunerup isumalimmik atorneqarlunilu siunertaqarneranik misigilissaatit, tamannalu ilinnik allanillu nuannaarnerulersitsilluni.

Ikiorneqarnissamik pisariaqartitsininni siullermik ikiorneqanngikkuit nakkaannaqinak. Misileeqqigit imaluunniit inummik allamik sullissivimmilluunniit attaveqarlutit.

Pimoorutiguk!
Inuk imminut toqunnissamik navianartorsiortoq akinniippat tamanna sualuppoq isumagiuminaallunilu. Inoqatitut najuunnissat – ilagalugu, tusarnaarluarlutit misiginneqatiginnillutillu iliuuserisinnaasanni pingaarnerpaavoq. Imminut toqunnissamik navianartorsiortumut ilungersunartunik oqaluuserisaqarneq oqilisaataarujussuarsinnaavoq.

Uteriigit
Inummik immaqa ikiorneqarusunngitsumik ikiuiniarneq ajornakusoorsinnaagaluartoq uteriinnissaq pingaaruteqarpoq. Inuk oqaluttuutissavat inuunerminik kipititsinissaa kissaatiginngikkit. Angajoqqaavi, qatanngutai, meerai, soraluai ikinngutaalu pillugit apersuinikkut inuunermi isiginiagassat allat ukkatarinissaannut ikiukkit. Qanigisaasut allat attaviginissaat neqeroorutigut pisumi kisimiinnginnissat pillugu.

Allat peqataatikkit – kisimiissanngilatit
Nammatassap kisermaatinnginnissaa pingaaruteqarpoq. Pisoq pillugu allat oqaloqatigikkit, inuillu marluullusi tatigisasi peqataatikkit. Pisariaqassappat pikkorissunit ikiorneqarnissaq siunertaralugu peqqinnissaqarfik imaluunniit Tusaannga attavigiuk. Peqqissaavimmukarnissamut napparsimmaviliarnissamulluunniit inuk pineqartoq ilaajumanngippat oqarsinnaavutit politiinut attaveqartariaqassallutit.

Kalaallit Nunaanni Pinerluttulerinermi Inatsit, kap. 19
§ 89: Imminut allalluunniit navianartorsiortinnagit inuk ikiortissaarutsikkaanni inuuneranik navianartorsiortillugu imaluunniit inuk inuunermik navianartorsiortoq qimaannaraanni tamanna pillarneqaataasinnaavoq.

Ikiortissamik aggertoqartinnagu inuk kisimiitinneqassanngilaq
Isumannaatsumik aaqqiissutissarsinissamut ikiuuttussanilluunniit takkuttoqarnissaata tungaanut inuk nakkutigiuk kisimiinnginnissaalu isumagalugu.

Ikiortissaqarpoq

Pisumi kisimiinnginnavit eqqaamassavat. Illit suliassavit ilagisinnaavaa imminut toqunnissamik navianartorsiortup pikkorissunit ikiorneqarnissaata qulakkeernissaa. Pisumi imminut isumaginissat aamma pingaaruteqarpoq.

Qanoq iliornissat nalornigigukku apeqqutigisinnaasatit

Toqqaannartunik apeqquteqarnissaq killinik qaangiinertut misiginarsinnaasarpoq, kisianni apeqquteqarfigineratigut imminut toqoriarnissaq pilersissinnaanngilat. Ikiortissaq qanoq ittoq pisariaqartinneqartup paasinissaanut apeqqutit pisariaqarput:

• Inuk qanoq imminut toqunnissaminut aalajangersimasumik pilersaaruteqarpa?

• "Ikiorniarlutit maaniippunga, massakkut qanoq innersutit paaserusuppara. Imminut ajoqusernissannut periusissannik eqqarsaateqareerpit?"

• Imminut toqunnissamut piareersaasiortoqarsimava, soorlu inuulluaqqussummik allagaqarluni?

• "Ernumagivakkit, imminullu qanoq iliornissamut aalajangersimasumik pilersaaruteqarsimanersutit tusarusuppara? Assersuutigalugu allagaqarsimavit allatulluunniit piareersarlutit?"

• Soorlu nakorsaatinik, sakkunik, allunaasamik assigisaannilluunniit atugassaqarpa peertariaqartunik mattuttariaqartunilluunniit?

• "Imminut ajoqusernissannut, soorlu nakorsaatinik, sakkunik allanilluunniit pissarsisinnaanersutit paasissallugu pingaartippara. Taamaappat imminut ajoqusinnginnissannut isumannaatsumik periusissamik marluulluta nassaarsinnaavugut."

• Imminut toqunnissap qaqugu pinissaa ullulerneqarsimava?

• "Imminut ajoqusernissannut piffissaq ullorluunniit, sumilu pinissaa eqqarsaatigisimaviuk? Oqaloqatigiissutiginissaa pingaaruteqarpoq qanoq ikiorneqarnissat nassaariniassavarput."

Akissutit arlaqartut “aappiuppata”, inuk erngertumik ikiortariaqarpoq.

Pinartoqartillugu, assersuutigalugu inuk imminut toqunnialerpat imaluunniit imminut toqunnissamik siorasaaruteqarpat politiit ingerlaannaq attavigineqassapput uunga 70 14 48. Ataasiarluni ikiortissarsiunngitsoornermit arlaleriarluni ikiortissarsiornissaq pitsaaneruvoq. Ikiuinissaq qanoq ittoq pisariaqarnersoq nalornigigukku, imminut toqunnissamik navianartorsiortoq peqatigalugu najukkami peqqinnissaqarfik attavigisinnaavarsi. Attaveqarnissamut paasissutissat uani nassaarikkit: Attavissat: peqqik.gl

Inuk ikiorneqarumanngippat qimagullunilu politiit ingerlaannaq attavigissavatit uunga: 70 14 48

Kalaallit Nunaanni Pinerluttulerinermi Inatsit, kap. 19
§ 89: Imminut allalluunniit navianartorsiortinnagit inuk ikiortissaarutsikkaanni inuuneranik navianartorsiortillugu imaluunniit inuk inuunermik navianartorsiortoq qimaannaraanni tamanna pillarneqaataasinnaavoq.

Akissutit arlaqartut “naaggaarpata”, ikiorneqarnissaq suli pisariaqarsinnaavoq.

Pisup pinarnera annikinnerugaluarluni pimoorunneqartariaqarpoq, pikkorissuniillu ikiorneqarnissaq suli pisariaqartinneqarsinnaalluni. Najukkanni peqqinnissaqarfimmut ikiortissarsiorit.

• Qulaani nassuiarneqartutut inoqatitut najoruk.
• Kisimiissanngilatit – marluullusi tatigisassinnik peqataatitsigitsi.
• Isumannaatsunik ataatsimoorlusi qanoq sinaakkusiinissarsi isumaqatigiissutigisiuk.
• Atortut navianarsinnaasut inuup eqqaanit piikkit.

Inuup qimannissaa toqqissisimanartikkukku tulliuttunut attaveqarsinnaanissaa isumagiuk:

• Illit qanigisaasorluunniit alla
• Politiit
• Najukkami peqqinnissaqarfik
• Tusaannga

Peqqinnissaqarfimmik oqaloqateqaqqaarnissamut peqataanissat neqeroorutigiuk attaveqarnissamullu ikiorlugu.

Qanigisaasutut aalajangiisumik atuuffeqarputit. Imminut toqunnissamik navianartorsiortoq pillugu immikkuullarissumik ilisimasaqakkajupputit, tamatumani nappaataasinnaasut, ersiutit takussutissaallu pillugit misilittakkat ilanngullugit. Taamaammat suleqatissaavutit pingaarutilik – imminut toqunnissamik navianartorsiortumut, peqqinnissaqarfimmut isumaginnittoqarfinnullu. Peqataatinneqarnissaq ilungersunarsinnaagaluartoq, qanigisaasut amerlanersaasa misigisarpaat pisariaqartinneqartumik ikiuinissap tapersersorneqarnissallu qulakkeernissaannut najuunnertik aalajangiisuusoq.

Qanigisatut qaqugukkut ikiortissarsiussavit?

Illit nammineq ikiorneqarnissamik pisariaqartitsinissat imaluunniit ikiorneqarumaartutit periarfissaavoq. Imminut toqunnissamik eqqarsaateqartumut qanittumiillu artornartorujussuusinnaavoq suliariuminaallunilu. Sualuttumik misigigukku nalorniguilluunniit nangaanak ikiortissarsiussaatit.

Tusaannga uunga attavigiuaannarsinnaavat
oqarasuaat: 80 11 80, imaluunniit SMS: 18 99
imaluunniit Tusaannga.gl-imi chaterlutit, kinaanermik isertuussisoqarsinnaavoq akeqaranilu.

Meeraavit qanigisaasoq?
Meeraaguit qanigisaasoq ikiorneqarnissamut immikkut periarfissaqarpoq. Assersuutigalugu atuartuuguit inersimasumut tatigisannut, soorlu ilinniartitsisunnut allamulluunniit toqqissisimanarisannut, tapersersorneqarnissamik ujartuisinnaavutit.

Tusaannga uunga attavigiuaannarsinnaavat
oqarasuaat: 80 11 80, imaluunniit SMS: 18 99
imaluunniit Tusaannga.gl-imi chaterlutit, kinaanermik isertuussisoqarsinnaavoq akeqaranilu.

Inuusuttuuit qanigisaasoq?
Inuusuttuuguit inersimasumut tatigisannut ikiortissarsiorsinnaavutit, imaluunniit atuartuuguit ilinniartuuguilluunniit ilinniartunut siunnersorti aqqutigalugu.

Tusaannga uunga attavigiuaannarsinnaavat
oqarasuaat: 80 11 80, imaluunniit SMS: 18 99
imaluunniit Tusaannga.gl-imi chaterlutit, kinaanermik isertuussisoqarsinnaavoq akeqaranilu.

Tatigisannik oqaloqateqarit

Misigissutsitit kisimiillutit nammannginnissaat pingaaruteqarpoq. Ikinngutigilluakkannik, ilaquttannik, suleqatinnik allamilluunniit tatigisannik oqaloqateqarit. Ernumagisannik qanoq artornartigisinnaaneranik paasinnittumut oqaluttuarneq oqilisaataarujussuarsinnaavoq.

Imminut toqunnissamik eqqarsaateqartumik qanoq oqaloqateqarnissaq pillugu uani paasisaqarit:
Imminut toqunnissamik eqqarsaatit - Tusaannga

Ikiuussinnaasut

Tapersersorneqarnerunissamik pisariaqartitsiguit pikkorissunit ikiorneqarnissamut arlalinnik periarfissaqarpoq:

• TUSAANNGA
• Peqqinnissaqarfik
• Kommuninni isumaginnittoqarfik
• Najukkanni palasi
• Tarnip pissusaanik ilisimasalik namminersortoq

Qanigisannik imminut toqunnermut annaasaqarsimaguit ikiortissaqarpoq. Piffissami artornartorsiornermi ikorfartorneqarnissamik pisariaqartitsininni ikiortissarsiorfigisinnaasatit pillugit paasissutissat linkillu atorneqarsinnaasut maani nassaarisinnaavatit.

Inummik imminut toqunnikkut annaasaqarneq annaasaqarnernit allanit allaaneruvoq. Amerlasuunit qanoq annaasaqarsimanerup annaasaqarnertuulli naalliunnartigisutut naalliunnarnerusutulluunniit misigineqartarpoq.

Sumiginnarneqartutut misigineq

Qimagaasut marloriaammik sumiginnarneqartutut misigisarnerat nalinginnaavoq – toqusumit sumiginnarneqartutut namminerli aamma sumiginnaasimasutut misigisarput. Apeqqutit soorlu:

• Inuuinnarnissamut naammanngilanga?
• Sooq taamak misigisaqartippaanga?
• Sooq taamaaliorpa?
• Sooq oqanngila?
• Sooq ikioqqunngila?
• Pisuussutigaara?
• Pinngitsoortinniarlugu qanoq iliorsimasinnaagaluarpunga?

Apeqqutit taakku nalinginnaapput, paasinarput nammannissaalu ilungersunarsinnaallutik. Inuit annaasaqarnermut assigiinngitsunik qisuariartarmata eqqaamassavat. Misigissutsit qisuariarnerilluunniit “kukkusuusinnaanngillat”.

Imminut toquttut amerlasuut sivisuumik ajornartorsiuteqarsimasarput qaangerneqarsinnaanngitsutut misigisaminnik isumaqartarlutillu ikiorneqarsinnaanatik. Kukkullutik isumaqakkajupput pitsaanerulernissamut suut tamaasa misilissimallugit kialluunniillu qanoq artorsartiginertik pillugu tusarnissartik artussagaat. Misigissutsit taakku tunngavigalugit inuunerminnik unitsitsisarput.

Pingaarutilik: Inuup allap imminut toqunnera inummit allamit akisussaaffigineqanngilaq.

Ikorfartorneqarnissamut periarfissat

Kisimiinngilatit. Ikiortissarsiorfigisinnaasannik peqarpoq:

• Tusaannga
• Najukkanni peqqinnissaqarfik
• Isumaginnittoqarfik (immikkut pingaaruteqarpoq meerartaqarsimappat)
• Nuna tamakkerlugu aliasunneq pillugu sullissivik
• Najukkanni aliasoqatigiit
• Najukkanni palasi

Imminut toqunnermut annaasaqarneq misigisaavoq artornartorujussuaq, tassungalu atatillugu misigissutsit paasiniarnissaat suliarinissaallu ajornartorsiutaasinnaallutik. Toqusumut suleqataaguit, ikinngutaaguit, sungiusaasuuguit, ilinniartitsisuuguit allatulluunniit qanigisaaguit apeqqutaatinnagu illit aliasunnerit misigissutsitillu akuerinissaat isumaginissaallu pingaaruteqarpoq.

Annaasaqarnermik, paatsiveerunnermik imminullu pisuutinnermik misigineq
Imminut toquttoqarsimatillugu amerlasuut imminut pisuutinnermik misigisarput. Eqqaamasariaqarpoq illit pisuussutiginnginnakku. Toqusup ilungersuutigisaanik inuttut itisuumik pisariusumillu qaangerniagassaqarsimanerani imminut toqunneq tikinneqakkajuttarpoq, tamannalu kisimiilluni unitsinneqarsinnaanngilaq.

Ilungersuuteqarnermi tapersersuineq
Piffissami paatsiveerusimallunilu ilungersorfimmi inuup qimagunnerani ilisinermik aaqqissuussinermik imaluunniit allanik suliassanik isumaginninnikkut ikiuussinnaavutit. Suliassat tungaatigut tapersersuinerit annaasaqarnermik attortissimaqisunut iluaqutaarujussuarsinnaavoq.

Aliasuutip akuerinissaa
Imminut toqunneq annernarpoq, nalinginnaavorlu kamannermik, aliasunnermik, sumiginnarneqarnermik kanngusunnermillu sakkortuumik paatsuunganartumillu misigisaqarneq. Eqqugaasut ilisimatissavatit misigissutsit taakku nalinginnaasuummata aliasunnerullu ingerlaneranut ilaallutik. Aliasunneq timikkut malunniussinnaavoq assersuutigalugu naarlunnikkut niaqorlunnikkullu. Imminut toqunnerup kingorna aliasunnerup aliasunnernit allanit allaanerunera inummiillu inummut assigiinngitsumik pisinnaanera akuerissallugu pingaaruteqarpoq.

Pikkorissunit ikiorneqarnissamut siunnersuineq
Illit allalluunniit pisariaqartitsisorigukkit siunnersuisumut, nakorsamut isumalluutinulluunniit allanut tapersersuinermik neqerooruteqarsinnaasunut innersuussisariaqarputit. Amerlasuut misigissutsitik oqaluuseriuminaatsissinnaagaluaraat imaluunniit oqaluuserinissaannut piareersimanngikkaluarpata nipaatsumi peqatiginissaat iluaqutaasinnaavoq, assersuutigalugu pisuttuarluni, suliaqarluni ilagiinnarlugilluunniit.

Sivisuumik aliasuuteqarnermik paasinninneq
Anniaatip immaqa tammavinnaviannginnera piffissalli ingerlanerani inooqatigisinnaalersinnaanera pillugu piviusorsiortumik isiginnigit. Asasat puigorneqanngikkaluarlutik nuannaarnerup nanineqaqqissinnaanera pillugu qimagaasut ilisimatinnissaat pingaaruteqarpoq.

Ataatsimoornerup tapersersuinerullu pingaarutaat
Inuk atassuteqarfigisimasat inuunerminik kipitsippat silarsuup isaneratut misigineqarsinnaavoq. Misigissutsitit pillugit arlaannik oqaloqateqarnissaat taamaammat pisariaqarpoq. Eqqarsaatitit pillugit ikinngutigilluakkannik, suleqatinnik, ilaquttannik allamilluunniit tatigisannik eqqartuigit. Aliasuutigisaq pillugu oqaluttuarneq nammatamik oqilisaataasinnaavoq ingerlaqqinnissannullu pisariaqartitannik tapersersorneqarlutit.

Tapersersuineq isumalluutillu
Aliasunnerit kisimiillutit isumagisinnaanngikkukku imaluunniit pikkorissunit ikiorneqartariaqaruit isumalluutit arlallit periarfissaapput:

• Tusaannga: Siunnersorneqarlutillu tapersersorneqarfigisinnaasat.
• Najukkanni peqqinnissaqarfik: Eqqortumik tapersersorneqarnissannik katsorsarneqarnissallu ikiorsinnaavaatsit.
• Palasi: Ilaasa palasimik upperisamiluunniit siunnersuisunik allanik oqaloqateqarneq tuppallernarisarpaat.

Qanimut avatangiiserisanik isumaginninneq
Avatangiisini toqusup inituumik atuuffigisimasaaneeruit, soorlu suliffeqarfimmi, atuarfimmi timersoqatigiinniluunniit susoqarsimanerata oqaasinngortinnissaa ajornartoornermilu tapersersoqatigiinnissaq pingaaruteqarpoq. Ataatsimoornissaq inummillu eqqaaniaanissaq immaqa iluaqutigisinnaavarsi. Piffissami ilungersunartorsiorfiusumi aalajangiisumik ataatsimoornermik tapersersoqatigiinnermillu misigisaqartitsisinnaavoq.

Tapersersuiuarneq
Ilungersunarsinnaagaluartoq annaasaqarnermik eqqugaasunik allanik tapersersuinerup attannissaa pingaaruteqarpoq. Ikiortissarsiornissamut misigissutsinillu eqqartuinissamut qiimmassaajuarit. Ilalersukkit kisimiinnginnerannillu eqqaasittarlugit.

Ikiortissaqartuaannarmat kisimiillutillu aliasuttariaqannginnavit eqqaamassavat. Pisariaqartitsiguit tapersersortissarsiorit sunnerneqarsimasunullu ilalersuillutit. Artorsaateqarnissinni ataatsimoorlusi qaangiisinnaavusi.

Imminut toqunnissamik pinaveersaartitsinermut atortunik uani nassaarit

Immikkoortumi matumani atortut imminut toqunnissamik pinaveersaartitsinermut suliarineqarsimasut nassaarisinnaavatit. Suliaqartut imminut toqunnissamik eqqarsaateqartut, imminut toqoriaraluartut imminullu toquttut isumaginissaannut ikiuutissatut Paarisap atortut maani katersorsimavai. Atortut kommunini inerisarneqarsimapput sulinermilu ataqatigiinnerni assigiinngitsuni sakkussanik atorneqarsinnaasunik imaqarlutik.

Atortut:

QAMANI

Isumannaallisaanermut pilersaarut

ICC-p suliniutaa "Imminut toquttarneq isumannaatsumik oqaluuserisinnaavarput

Paasisaqarnerunissamut

Atortut pillugit apeqqutissaqaruit Paarisa attavigisinnaavat ukunatigut:

• E-mail: paarisa@nanoq.gl
• Oqarasuaat: 34 50 00