airplanebooksbriefcase business cogs cross election entertainment fish house law lockmedicalpeopleselfservices socialtax

Ujaruk

Suleqatigiinnerit

Suleqatigiinnissamik isumaqatigiissutissap imaa uani atuarsinnaavat assersuutitsialaallu isumassarsiorfigalugit.


Suleqatigiinnerit tassaapput suleqatigeeriaatsit aaqqissueriaatsillu, pisortat suliffeqarfiinni inuillu nammineq kajumissutsiminnik suliaqarfinni oqaloqatigiinnissamik ataatsimullu aaqqiissutissanik pisussaaffiliisut.
Suleqatigiinneq pissusissamisoortarpoq suleqatigiit piginnaasamikkut, nukissamikkut ilisimasamikkullu ataqatigiissitsiumagaangata, ajornartorsiutit piviusut aaqqiissuteqarfiginiarlugit imaluunniit suleriusinik aamma sammisassanik nutaanik ineriartortitsiniarnermi angusaqarluarfiginiarlugit.
Suleqatigiinni suleqatigiinnermi siunertaavoq ataatsimoorluni isumassarseqatigiinneq. Tassa imaappoq ataatsimut suleqatigiinnikkut pissarsiaqarnerusarput, immikkoorlutik suliaqarnermiit.

Suleqatigiilernissamut najoqqutassiaq

Suleqatigiinniarluni ataatsimooraanni anguniagaq, atuuffiit sivisussusaalu pillugit naatsorsuutigisanik naligiissaarinissaq pingaaruteqarpoq. Isumaqatigiissut allanneqassaaq peqataasunillu tamanit atsiorneqarluni. Peqataasut akornanni ataatsimut paasinninnissap pisussaaffeqarnissallu qulakkeernissaa siunertaavoq. Peqataasut tamarmik suleqatigiinnissamut piffissamik isumalluutinillu atuerusussuseqassapput.

Immikkoortut ataaniittut arlaqartut naatsorsuutigisat ersarissumik naleqqussarsimanissaannik, atuuffiit agguataarnerisa ersarissuunissaannik, ataatsimut anguniagaqarnissamik, suliassat aalajangersimasut, najukkamut naleqqussaanermik piujuaannartitsisumillu tunngaveqarnissamik qulakkeerinneqataassapput.

Peqataasut - Suleqatigiinnermi suliaqartut sorliit peqataassapput - aamma sooq?

Siunertaq - Suliniummut suna siunertarineqarpa? Suleqatigiissutiginissaa sooq pingaaruteqarpa? Ataatsimoorluta sumut ingerlassaagut?

Sullitat - Suliniummut kikkut sullitaappat? Sullitanut attaveqarneq attaveqaqatigiinnerlu qanoq qulakkeerneqassava?

Najukkamut naleqqussaaneq - Suliniut najukkami atugassarititaasunut periarfissanullu qanoq naleqqussarneqassava?

Atuuffiit - Peqataasut assigiinngitsut sulianik qanoq ittunik tunniussaqarsinnaappat? Peqataasut akornanni pitsaasumik attaveqaqatigiinnissaq qanoq qulakkeerneqassava? Suleqatigiinneq qanoq aqunneqassava ataqatigiissarneqarlunilu - aamma kimit? Isumaqatigiissummut kina attaveqaataassava?

Aningaasaqarneq - Aningaasaqarnermut kina akisussaasuua? Aningaasaqarneq sumi inissisimava?

Malitassat allat - Nipangiussisussaatitaaneq, ilisimatitsisussaatitaaneq, sillimmasiinerit sulinermilu isumannaallisaaneq pillugit suut isumaqatigiissutigineqassappat? Qanoq meeqqanut pinerliisimannginnermut uppernasaat pinerlussimannginnermullu uppernarsaat aaneqassava? 

Allannguutit - Suleqatigiinnerup ingerlanerani qanoq allannguisoqarsinnaassava?

Isumaqatigiinnginnerit - Ingerlatsinermi isumaqatigiinngittoqassappat taakku qanoq isumagineqassappat?

Malitseqartitsineq - Isumaqatigiissut ataavartumik qanoq malitseqartinneqartassava? Qanoq nalilersorneqassava?

Naanera - Suleqatigiinneq qaqugu naammassissava? Kingorna susoqassava? Siunissami piujuaannartitsisumik ingerlanneqarsinnaassava?

Suleqatigiinnermut assersuutit

Unnuarissat, GrønlandsBanken aamma Hotel Hans Egede
GrønlandsBanken Nuummi Unnuarissat sulinerannut kajumissutsimik sulinermut atatillugu sulisuminik atugassiinermigut peqataapput. Unnuarissat siulersuisuisa ataatsimiiffigisinnaasaannik aningaaserivik ininik aamma atugassiivoq. Kajumissutsiminnik Unnuarissat kavaajaat atortuutaallu Hotel Hans Egedemit ilisaatigineqarput. Uani paasisaqarnerugit


Kalaallit Røde Korsiat, KNI Engros atuarfiillu
Kalaallit Røde Korsiat (KRK) Ilulissat KNI ullaakkorsiutissanik tunniussaqartoq suleqatigalugu illoqarfimmi meeqqat atuartut ullaakkorsiutissaat qulakkeerpaat. Illoqarfimmi atuarfiit atuarfinni ullaakkorsiutinik agguaaneq isumagisaraat. Uani paasisaqarnerugit.


Meeqqat Ikiortigit aamma Ilaqutariinnut sullissivik
Meeqqat Ikiortigit Nuuk najukkamilu Ilaqutariit Sullissiviat meeqqanut ilaqutariinnullu Ilaqutariit Sullissiviannut attuumassuteqartunut suliassaqartitsineq suleqatigiissutigaat. Meeqqat Ikiortigit kajumissutsimik tunniussassaanut Ilaqutariinnullu Sullissiviup sunik pisariaqartitsineranut tunngatillugu suleqatigiinnissamut isumaqatigiissummik ukiut tamaasa nutarterisarput. Uani paasisaqarnerugit


Kalaallit Nunaanni innuttaasut peqqissusaannut sullissivik - Center for Folkesundhed i Grønland (SIF), Paarisa aamma Qeqqata Kommunia 
Inuunerissaarneq siuarsarniarlugu najukkani nukittoqutit pisariaqartinneqartullu peqataasunit misissorneqarput. Ilisimasat taakku peqqissutsimik siuarsaanermik ineriartortitsinermut atorneqarput. Suleqatigiinneq Qeqqata Kommuniani meeqqat inuusuttullu akornanni peqqissutsimik atugarissaanermillu siuarsaassaaq. Uani paasisaqarnerugit.


Paamiuni Unnuarissat aamma Kommuneqarfik Sermersooq
Paamiuni Unnuarissat kommunemik suleqateqarput, Unnuarissat suliniuteqarnerminni suliassatigut allaffissornikkullu kommunimi sulisumit isumagineqarnerisigut. Uani paasisaqarnerugit.


Mind Your Own Business inuussutissarsiuteqartullu
Mind Your Own Business suleqatigisaat ilaat tassaapput Kommuneqarfik Sermersooq, GrønlandsBanken, Royal Greenland, VisioBox Consulting aamma GREATTALKS. Uani paasisaqarnerugit.


Qeqqata Kommunia aamma Timersoqatigiit Kattuffiat

Qeqqata Kommunia Timersoqatigiit Kattuffiannik isumaqatigiissuteqarpoq kommunimi kajumissutsimik sulinissamut akunnernik tunniussaqarluni. Imaappoq kommunimi sulisut sulinerminni kajumissutsimik suliaminnik suliaqarsinnaapput. Uani paasisaqarnerugit.


NANU Meeqqat inuussutissarsiuteqartullu
NANU Meeqqat ilaqutariit arlaqartut juullimi juullerpaluttunik nerisaqarnissaat tunissutissaqarnnissaallu ukiut tamaasa qulakkeertarpaat. Tamanna pisinnaavoq ilaqutariinnut juullimi ikiuutissanik tunniussinissamut periarfissiisunik inuussutissarsiuteqartut aningaasatigut tunniussisarnerisigut. Uani paasisaqarnerugit.


Atoqatigiinneq pillugu inuusuttut paasissutissiisartut (sexualister) inuusuttunullu klubbit
Ungdomsringen aqqutigalugu Narsami inuusuttut "atoqatigiinneq pillugu paasissutissiisartutut" (sexualister) ilinniartinneqarput. Inuusuttut peqqinnartumik atoqateqartarneq pillugu inuusuttunut klubbi aqqutigalugu inuusuttunut allanut ilinniartitsipput. Uani paasisaqarnerugit.


Timersoqatigiit Kattuffiat, UNICEF aamma Paarisa

Peqataasut ataatsimoorlutik sungiusaasutut pikkorissartitsinernik inerisaaniarput kiisalu peqqinnartumik peqataatitsisumillu ataatsimoornernik siuarsaallutik. Meeqqat pisinnaatitaaffii meeqqanillu innarliisimannginnermut uppernarsaatinik piniartarneq ilaatigut ukkatarineqassapput. Saqqummiussineq uani takuuk.

 

Atuarsinnaasatit allat

Kajumissutsinnik sulilerit

Sumi qanorlu kajumissutsimik sulilersinnaanerlutit uani takusinnaavat.

Uani atuaruk

Aningaasaateqar­fiit aningaasaliis­sutillu

Suliniaqatigiiffiit aningaasaanik qinnuteqarfigisinnaasaasa takussutissartaat
uani allassimapput.

Uani atuaruk

Oqaluttuat

Kajumissutsiminnik sulisut inummut inuiaqatigiinnullu qanoq isumaqartiginerat uani atuarsinnaavat.

Uani atuaruk

Suliniaqatigiiffiit

Suliniaqatigiiffiit Nunatsinni isumaginninnermut tunngasunik suliaqartartut uani takusinnaavatit.

Uani atuaruk

Najukkami kissaatigineqar­tut

Nunatsinni suliniutit apeqqutigineqartartut suunerat uani atuarsinnaavat.

Uani atuaruk