Manumina meeqqanut atuakkat nutaat saqqummilersut
Meeqqat angajoqqaallu Manuminap silarsuaanut alakkaqqinnissaminnut qilanaartuutissaqalerput. Aggustimi angajoqqaanut suliniut MANU atuakkanik marlunnik saqqummersitsissaaq – ”Manumina atualerpoq” aamma ”Manuminap timaa”. Juullertinnagulu atuakkanik marlunnik aamma saqqummersitsisoqaqqikkumaarluni.
Neriuutigeqaara meerarpassuit angajoqqaarpassuillu Manumina pillugu atuakkiat nutaat nuannariumaaraat. Atuakkani meeqqat inuunerissaarnissaat peqqissuunissaallu pillugu sammisat pingaarutillit iserfigineqarput. Taamaattumik angajoqqaat inersimasullu allat atuakkat atorlugit meeqqat ineriartornerannut sakkussanik aallerfigisinnaavaat.
Manumina pillugu atuakkani nutaani pinnguarneq aalaneq, timi, eqqiluisaarneq atuarnerlu sammineqassapput. Atuakkanilu sammineqartut Manuminap inuunera misilittagaalu aallaavigalugit oqaluttuarineqassallutik. Misilittakkallu taakkua meeqqat tarrarsorfigisinnaavaat. Atuakkani ilaqutariinni ataasiakkaani sumiikkaluaraanniluunniit ulluinnarni ajornartorsiutaasartut tunngavigineqarput. Atuakkanut tamanut angajoqqaanut mappersagaqarpoq taakkunanilu atuarneqarsinnaassaaq meeqqat peqatigalugit sammisat sorliit itisilerneqarsinnaanersut isumassarsiatsialannillu aamma imaqarluni.
Manumina pillugu atuakkiat angajoqqaanullu mappersakkat meeqqerisunut, ernisussiortunut perorsaasunullu akeqanngitsumik tunniussuunneqassapput. Angajoqqaalli atuakkanik piniarunik qaqugukkulluunniit MANU-kkunnut saaffiginnissinnaapput.
”Ukioq Qaanaamukarama nammineerlunga Manumina pillugu atuakkiat siulliit nassarakkit, nammineerlunga takuara innuttaasunit qanoq tigulluarneqartiginersut. Tamannalu assut nuannaajallaatigisorujussuuara. Tamassuma aamma takutippaa meeqqanut atuakkat kalaallit isaannit meeqqanut, angajoqqaanut allanillu isumaginnittuusunut tarrarsorfigineqarsinnaasutut allanneqarsimasut qanoq amigaatigineqartiginersut.”
2019-imi ulloq inuiattut ullorsiornitsinnut atatillugu Manumina pillugu atuakkiat sisamat siulliit saqqummersinneqarput tigulluarneqaqalutillu. Taamanili kissaatigineqalersimavoq Manumina pillugu atuakkanik nutaanik saqqummersitsisoqaqqinnissaa maannakkullu tamanna piviusunngortinneqarpoq, ukua suleqatigineratigut Den Grønlandske Fond, Frederik aammalu Emma Krags mindelegat kiisalu Rotary.
Atuakkat MANU-p meeqqanut suliassaqarfimmi allarpassuit suleqatigalugit suliniutigineqarput, Miiannguaq Olsvig atuakkiortuulluni, titartaasoq Christian Rex Danmarkimilu God Barndom.
Miiannguaq Olsvig ima oqarpoq:
“Nuannersorujussuuvoq Manumina pillugu atuakkioqqissinnaasimagama, tassami meeqqanut atuakkiat kalaallinit allanneqartut amerlanngimmata. Suliarisimasavut tulluusimaarutigeqaakka atuakkallu ilaqutariinnut siammarterneqarnissaat qilanaaralugu.”
MANU angajoqqaanut pikkorissaaviuvoq tassanilu angajoqqaat naartulernerminnit meeqqap tallimmiinissaata tungaanut pikkorissaanissamut neqerooruteqartoqartarpoq. MANU Paarisap ataani inissisimavoq, Pitsaaliuinermut Isumaginninnermullu Aqutsisoqarfiup iluaniilluni. www.manu.gl aqqutigalugu atuaqqissinnaavutit.
Saqqummiunneqartut pillugit paasisaqarnerorusukkuit Paarisami ilisimasatigut aqutsisoq, Rikke Louise Kuhn oqarasuaammut +299 34 68 52-imut mailimulluunniit riku@nanoq.gl saaffigineqarsinnaavoq.