Ataatsimoorluta nunarput peqqinnerulersitsigu
Kalaallit peqqissuutikkusuppagut. Paarisa Brugseni, Pisiffik, KNI/Pilersuisoq aamma Royal Greenland suleqatigiinnissamut isumaqatigiissusiorneranni ataatsimut anguniagaat taamak nipeqarpoq. Isumaqatigiissutip qulequtaraa “Ataatsimoorluta pitsaasumik inuuneqalersitsivugut”
Nunatsinni peqqissuseq atugarissaarnerlu siuarsarniarlugu suleqatigiilluarniarpugut, inuussutissarsiuteqartut suleqatigiinnitsinni pingaaruteqartorujussuupput. Brugseni, Pisiffik, KNI/Pilersuisoq aamma Royal Greenland suliffeqarfiupput Kalaallit peqqinnerulernissaanut periarfissiilluarsinnaasut. Suliffeqarfissuummata amerlasuunik sulisullit kisianni aamma innuttaasunut ataasiakkaanut oqariartuuteqarsinnaammata.
Paarisa, Brugseni, Pisiffik, KNI/Pilersuisoq aamma Royal Greenland ukiut arlallit nerisaqarnermut innersuussutit qulit pillugit paasissutissanik siammarterinermi suleqatigiipput. Suleqatigiit maanna suleqatigiinnertik annertusivaat, tamannalu innuttaasut peqqissumik inuunissaanut oqilisaataassaaq. Suleqatigiinnissamut isumaqatigiissutit nutaat piffissami 2020-2030 atuutissapput.
-''Nunatsinni peqqissuseq atugarissaarnerlu siuarsarniarlugu suleqatigiilluarniarpugut, inuussutissarsiuteqartut suleqatigiinnitsinni pingaaruteqartorujussuupput. Brugseni, Pisiffik, KNI/Pilersuisoq aamma Royal Greenland suliffeqarfiupput Kalaallit peqqinnerulernissaanut periarfissiilluarsinnaasut. Suliffeqarfissuummata amerlasuunik sulisullit kisianni aamma innuttaasunut ataasiakkaanut oqariartuuteqarsinnaammata.'' Peqqissutsimut, Isumaginninnermut Inatsisinillu Atuutsitsinermut Naalakkersuisoq, Martha Abelsen oqarpoq.
- ''Pisiagut, imikkagut nerisagullu peqqissusitsinnut atugarissaarnitsinnullu isumalerujussuupput. Suleqatigiinnitta siunertaraa innuttaasut peqqissumik ileqqoqarnissamut aamma peqqissumik inuunissamut periarfissanik isumassarsiorfissaqartitsinissaq, tassani peqqinnartunik pisiniarneq, nerisaqarnermut innersuussutinut qulinut malinninneq aamma akuttunngitsumik aalisagartortarneq qitiutinneqarpoq.''
Suleqatigiinnissamut isumaqatigiissutigineqartut peqqissuseq atugarissaarnerlu pillugit FN-ip nunarsuaq tamakkerlugu anguniagassaq 3 aamma suleqatigiinnikkut anguniagaqarneq pillugu nunarsuaq tamakkerlugu anguniagassaq 17 aallaavigai. Suleqatigiit saniatigut qulequttat aalajangersimasut aallaavigai, matumani:
- Peqqissumik ileqqoqarnissamut paasissutissat pitsaasut siammarternissai isumassarsiorfissaqartitsinissarlu
- Nerisaqarnermut innersuussutinut qulinut malinnittut amerlillugit, peqqissoorusunneq oqinnerulersinniarlugu pissusissamisoornerulersinniarlugulu
- Innuttaasut aalisagartukulanerulernissaanut isumassarsiorfissaqartilernissai aamma aalisagartukulanissamut innersuussutinut malinnittut amerliniarlugit
- Nerisagissaarnermut ileqqut ersersinniarlugit ileqqorissumillu aalakoornartortalimmik atuineq
Paarisa nuna tamakkerlugu pitsaaliuinermut immikkoortortaavoq isumaginninnerup peqqinnissaqarfiullu iluini peqqinnissakkut siuarsaanermik pitsaaliuinermillu suliaqarpoq. Paarisap peqqissuseq atugarissaarnerlu pillugu susassaqarfiit attuumassutillit tamaasa ilagalugit suleqatigiilluarnissaq suleqatigiinnissaq pingaartippaa.
Paasisaqarnerorusukkuit Paarisami immikkoortortami pisortaq Ditte Sølbeck oqarasuaat +299 34 60 37 imaluunniit e-mail ditt@nanoq.gl