Atualeqqaarneq pillugu meeqqanut atuagaq nutaaq saqqummersinneqarpoq
Ilaqutariinnut meerartalinnut tamanut ”Manumina atualerpoq” angajoqqaanut mappersagartalik maanna piareerpoq
Atualeqqaarneq meeqqap inuunerani pingaarutilerujussuuvoq. Ilaqutariit tamarmik allanngortoqarnera misigissavaat, pitsaasumillu aallartinnikkut ileqqorinnikkullu atualeqqaarneq ilaqutariinnut tamarmiusunut nuannaarnermik misigisanillu nutaanik pilersitsissaaq. Taamaattumik angajoqqaat meerartallit tamarmik atualeqqaarsitsinerminni piffissamut nutaamut pissanganartumut tassunga atorsinnaasaannik meeqqanut atuakkamik nutaamik angajoqqaanut mappersagartalimmik saqqummiussisinnaagama nuannaarutigeqaara
Meeraqarpit 1. klassimi atualertussamik? Nutaarsiassatsialammik taava peqarpugut! ”Manumina atualerpoq” angajoqqaanullu mappersagaq ”Qitornat atualerpoq” sunut tamanut nutaanut atuarfiup neqeroorutigisinnaasaanut piareersimanissamut angajoqqaanut meeqqanullu tamanut ikiuutissatut eqqarsaataavoq. Atualernermut ikaarsaariarneq meeqqap inuuneranik allanngortitsilluinnarsinnaavoq, angajoqqaatullu inuunermi ikaarsariarnerup nutaap tamatuma pitsaasumik misiginissaanut meeqqat ikiorsinnaavat. ”Manumina atualerpoq” atualernermi pisussat pillugit meeqqannik oqaloqateqarnissamut sakkussatsialaavoq. Isumaginninnermut, Ilaqutariinnut Inatsisinillu Atuutsitsinermut Naalakkersuisoq Martha Abelsen saqqummersitsinermut atatillugu ima oqaaseqarpoq:
”Atualeqqaarneq meeqqap inuunerani pingaarutilerujussuuvoq. Ilaqutariit tamarmik allanngortoqarnera misigissavaat, pitsaasumillu aallartinnikkut ileqqorinnikkullu atualeqqaarneq ilaqutariinnut tamarmiusunut nuannaarnermik misigisanillu nutaanik pilersitsissaaq. Taamaattumik angajoqqaat meerartallit tamarmik atualeqqaarsitsinerminni piffissamut nutaamut pissanganartumut tassunga atorsinnaasaannik meeqqanut atuakkamik nutaamik angajoqqaanut mappersagartalimmik saqqummiussisinnaagama nuannaarutigeqaara”.
Atuakkami niviarsiaraq Manumina, ima perortigisimalersoq atualernissaminut piareersartariaqarluni, malinnaavigaarput. Atualernissaq pillugu eqqarsaatai misigissusiilu malinnaavigaagut. Atuagaq taamatuttaaq pinnguaatinik, isumassarsiatsialannik sungiusaatinillu meeqqat peqatigalugu suliarisinnaasannik imaqarpoq. Atuagaq akeqanngilaq atualeqqaarnermullu atatillugu tunniunneqartassalluni. Angajoqqaalli meeqqanut atuakkiat soqutigigunikkit MANU-mi suleqatigiinnut attaveqarnissaminnut tamatigut tikilluaqqusaapput.
Qaammammi uani kingusinnerusukkut Manumina pillugu atuakkiani suli atuagaq ataaseq - ”Manuminap timaa” - saqqummersinneqassaaq, tassanilu timi pineqassalluni, qulequttat pingaarutillit, soorlu assersuutigalugu timimik pitsaasumik isiginninneq, inuttut nammineq killiliisinnaanerit namminerlu timimik piginnittutut isiginninneq sammineqarlutik.
Atuakkiortoq Miiannguaq Olsvig, assiliartalersuisartoq Christian Rex, Danmarkimi Center for Forældreskab aamma Ilinniartitaanermut Aqutsisoqarfimmit ilanngussat ilanngullugit, atuarfeqarnermut, isumaginninnermut peqqinnissaqarfimmullu suliassaqarfinni oqartussaasoqarfiit assigiinngitsunik suliallit akornanni suleqatigiissitat suleqatigalugit atuakkat MANU-mit suliniutaapput. Atuakkat Paarisamit, Holte Rotarymit aamma Frederik aamma Emma Kragimut eqqaassutissatut aningaasaateqarfimmit aningaasalersorneqarput. Atuakkat angajoqqaat quppersagaannik ilaqartinneqarput, sammineqartunik itisiliiviusunik, taamatullu aamma angajoqqaatut atuakkat qanoq atorneqarsinnaanerinik sammineqartullu meeraq peqatigalugu qanoq oqaluuserineqarsinnaanerinik isumassasiorfiusinnaasunik imaqarlutik.
Paasissutissat sukumiinerusut Paarisami sulianik aqutsisoq Rikke Louise Kuhn, oqarasuaat 34 68 52, e-mailikkut riku@nanoq.gl, attaveqarfigalugu imaluunniit www.manu.gl aamma www.paarisa.gl iserfigalugit pissarsiarineqarsinnaapput.