Timimik aalatitsineq, nerisassat peqqinnartut pisinnaatitaaffiillu Tasiilami atuartunit sammineqartut

Juulimi Maria Motzfeldt suleqatigalugu Paarisa Qeqertarsuarmi tamatumalu tunuani nuannarineqaqisunik workshop-ertitsivoq. Tamatumunnga tapertaasumik Tasiilami workshop-ertitsisoqassaaq. Workshop-ertitsinermi anguniagaavoq meeqqat ullualunni peqqinneq, timimik aalatitsineq, nerisassat, meeqqat pisinnaatitaaffii nuannersumillu ataatsimoorfeqarneq pillugit assigiinngitsorpassuarnik isumassarsiffiusussanillu sammisaqartinnissaat. Kommunimi sulisut, tassunga ilanngullugit pitsaaliuinermi siunnersorti Tasiilamilu atuarfimmi ilinniartitsisut aqutsisullu ikiuingaarlutillu suliniummik tapersersuipput.

-”Aasaq IGASA-mik workshop-ertitsinerit assut nuannarineqarput. Suliniutaavoq Paarisap aallukkusullugulu ineriartortikkusutaa. Siullermik aalajangiupparput timimik aalatitsineq pillugu ullormik ataatsimik workshop-i sivitsornissaa. Tamatuma saniatigut assut nuannaarutigaarput Tasiilami workshop-ertitsinermi UNICEF Kalaallit Nunaanni meeqqat pisinnaatitaaffiinik ukkatarinninneq pillugu suleqatigisinnaagatsigu. Meeqqat peqqinnerat atugarissaarnerallu pillugit assigiinngitsorpassuarnik suleqateqarnissarput assut pingaartipparput,” taama paarisami ulluinnarni suliaqarnermi aqutsisoq, Kirsten Fencker, oqarpoq.

Workshop-ertitsinissaq pillugu Paarisa aamma UNICEF Kalaallit Nunaanni siullerpaamik suleqatigiipput, suliniullu siunissami anguniagassaq eqqarsaatigalugit nalilersorneqarlunilu ineriartorteqqinneqassaaq.

-”Meeqqat pisinnaatitaaffitik pillugit nuannersumik ilinniarnissamut periarfissaqassammata suleqatigiissinnaanerput UNICEF-imiit nuannaarutigaarput. Meeqqap pisinnaatitaaffini ilisimagaangamigit naluneq ajorparput aamma killiliinissani ikioqqunissanilu ajornannginnerutissagaa. Aamma nalunngilarput ataatsimoorfimmut nuannersumut meeqqap ilaasutut misiginera pingaaruteqarluinnartoq. Workshop-imi ataatsimoorneq ukkatarineqarpoq. Misiliutitut suliniut ingerlaavartumik angusaqarfiulluarniassammat misilinnissaanut ineriartorteqqinnissaanullu qilanaarpugut. Maria aamma Akutaaneq maligassaalluartuupput qiimasut kajumissaarillaqqittullu,” taama UNICEF-imit suliniutinut pisortaq, Maliina Abelsen, oqarpoq.

Maria Motzfeldt ilaatigut meeqqanut juullimi ammartakkamiit Tammartakkami ilisimaneqarpoq kiisalu Akutaaneq Kreutzmann assammik arsartartutut pikkorivissutut meeqqanit ilisimaneqarluni.
-”Akutaanerlu Tasiilami meeqqat naapinnissaannut qilanaarpugut. Ataatsimoorneq, peqqinneq, nerisassanik nuannarisaqarneq timimillu aalatitsineq kiisalu meeqqat pisinnaatitaaffii pillugit oqariartuummik pitsaasumik soqutiginartumillu saqqummiussissaagut. Inuunerinnissamut peqqinnerup tungaanut meerartatsinnit inuusuttortatsinnillu torragineqarnerulernissaa anguniagaraarput,” taama Maria Motzfeldt, Akutaaneq Kreutzmann ilagalugu IGASA - AALASA pillugu workshop-imi ilitsersuisoq, oqarpoq.

Tasiilami IGASA - AALASA pillugu workshop-ertitsinermi atuartut 7. klasset ilaatigut nerisaqarnermut innersuussutit qulit, timimik aalatitsineq, nerisassat nerisasserinermilu nuannersut, meeqqat pisinnaatitaaffii, atugarissaarneq ataatsimoornerlu pillugit ilisimasaqalissapput. Nuannersunik ilinniarfiulluartunillu sammisassarpassuaqassaaq. Timeq aalatinneqassaaq, meeqqat igaffimmiissapput mamartunillu nerisassioqatigiillutillu nereqatigiissapput. Kiisalu pisinnaatitaaffiit pillugit sungiusaqatigiissallutik. Unnuk ataaseq nersimasunut sammisaqartitsisoqassaaq.


Paasisaqarnerujumallutit attavigikkit:

Paarisa: Ulluinniarni suliaqarnermi aqutsisoq, Kirsten Fencker oqarasuaatikkut: +299 34 69 06 e-mailikkulluunniit: kfen@nanoq.gl

UNICEF Kalaallit Nunaanni: Suliniutinut pisortaq, Maliina Abelsen oqarasuaatikkut: +299 54 86 60 e-mailikkulluunniit: MAbelsen@unicef.dk

IGASA - AALASA pillugu ilitsersuisoq: Maria Motzfeldt oqarasuaatikkut: +299 48 26 36 e-mailikkulluunniit: maria@marivik.com