Meeqqanik kinguassiutitigut atornerluineq pilllugu ilinniagalinnut Najoqqutassiaq tigulluarneqarpoq
Meeqqanik kinguaassiuutitigut atornerluineq pillugu suliamut ilisimasalinnut najoqqutassiaq meeqqanut kinguaassiuutitigut atornerluisarnerit pinaveersaartinnissaannut sulissuteqarnermut paasiniaasarnermullu pitsaasuusoq sakkutullu atorluarneqarsinnaasoq suliamut ilisimasallit arlallit nalilerpaat.
Sammisaq pillugu oqaloqateqarnissamut ernumassuteqartarnikuullunga suliamut ilisimasalittut maanna piareersimasutut misigisimalerpunga. Meeqqap meeraqatiminut kinguaassiornermut tunngasumik pissusilersorsimagaangat iliuuseqarnissannut isumakuluuteqartarnikuuvunga.
2019-imi novemberimi Isumaginninnermut Aqutsisoqarfiup meeqqanut atornerluisarnerit qanoq pinaveersaartinneqarsinnaanerinut, paasiniaaffigineqartarnerinut isumagineqartarnerinullu atuagaq najoqqutassaq saqqummiuppaa. Meeqqanut tunngasunik suliallit ataatsimut paasinartumik taaguuteqarnissaat ilisimasaqarnissaallu siunertaasimavoq. Atuagaq najoqqutassaq ulluunerani paaqqinnittarfinnut, atuarfinnut, sunngiffimmi ornittakkanut, isumaginnittoqarfinnut, ilaquttanut sullissivinnut, ulloq unnuarlu paaqqinnittarfinnut, politiinut napparsimavinnullu tamanut nassiunneqarnikuuvoq.
2020-mi Atuakkamut najoqqutassamut tunngatillugu malitseqartitsiniarluni misissuisoqarpoq. Apeqqutinut immersuiffissaq suliamut ilisimasalinnut 296-inut nassiunneqarpoq, taakkunanngalu 51%-it akisimallutik. Atugaq najoqqutassaq suliamut ilisimasalinnit tigulluarneqarsimasoq amerlanerusullu meeqqanut tunngasunik sulinerminni sakkutut atorneqarsinnaalluartutut isumaqarfigigaat misissuinerup takutippaa.
”Sammisaq pillugu oqaloqateqarnissamut ernumassuteqartarnikuullunga suliamut ilisimasalittut maanna piareersimasutut misigisimalerpunga. Meeqqap meeraqatiminut kinguaassiornermut tunngasumik pissusilersorsimagaangat iliuuseqarnissannut isumakuluuteqartarnikuuvunga" - Suliamut ilisimasalik, Meeqqanut ilaqutariinnullu sullissivik
"Atuagaq najoqqutassaq periarfissarpassuarnik tunniussisimavoq. Ersiutit qisuariaatillu kiisalu paasiniaasarneq sulininni eqqarsaatigisalersimavakka. Atuakkap najoqqutassap meeqqat ukioqqortussusaat aallaavigalugit immikkoortunut agguataarneqarsimanera, taamaalillunilu tigussaanera pitsaanerpaavoq" Suliamut ilisimasalik, Meeqqanut ilaqutariinnullu sullissivik
Malitseqartitsilluni misissuineq atuagaq najoqqutassaq malillugu siunissami sulinissamut tunngatillugu innersuussutinik arlalinnik kinguneqarsimavoq.
Innersuussutit taakkua ilaatigut tassaapput:
- Atuakkap najoqqutassap nunaqarfinni atuutilersinneqarnissaata immikkut eqqumaffigineqarnissaa, soorlu assersuutigalugu issiaqatigiilluni ilinniartitsinikkut pikkorissartitsinikkulluunniit
- Kinguaassiuutitigut tunngasumik peqqissuunissaq pillugu ilisimasatigut eqqumaffiginninnerunissaq
- Paasititsiniaanikkut meeqqat kinguaassiuutitigut kannguttaatsuliornermut sammisumik pissusilersortartut pillugit ilisimasanik annertusaaneq
- Atuakkap najoqqutassap ilinniarfinni assigiinngitsuni toqqammaviulersinnissaa
Malitseqartitsinermut nalunaarusiaq uani atuarneqarsinnaavoq.
Meeqqanik kinguaassiuutitigut atornerluineq pillugu suliamut ilisimasalinnut najoqqutassiaq Naalakkersuisut kinguaassiuutitigut atornerluisarnermut periusissiaanni, Killiliisa-mi suliniutaavoq. Atuagaq najoqqutassaq Paarisa.gl-imi aamma Naalakkersuisut.gl-imi aaneqarsinnaavoq
Attaveqarfissaq
Paasisaqarnerorusukkuit Paarisami immikkut siunnersorti, Maliina Junge Jørgensen emailikkut majj@nanoq.gl-ikkut imaluunniit oqarasuaatikkut 346022-kkut attavigiuk