Kajumissutsimik sulisarneq CV-mi misilittagaqarluarneruvoq
Kajumissutsimik sulinermi misilittagartartaartarnerit sammineqarnerusariaqarput. Tamanna kajumissutsimik sulisarneq soqutiginarnerulersissavaa.
NGO’t inuiaqatigiit kattuffiillu akornanni kajumissutsimik sulisarnermut siuarsaanissaannut ikiorneqassapput.
Innuttaasut kajumissutsiminnik sulileraangamik inuiaqatigiinnut inunnullu ataasiakkaanut naleqalersitsisarpoq.
“Kajumissutsimik sulisarneq CV-mi misilittagaqarluarnertut isigineqartariaqarpoq”. Tamanna ulloq 9. Juni Nuummi attaveqaatit ataatsimiisinneqarnerannut NGO’nit innersuussut nipeqarpoq. Tassani kajumissutsimik sulisinnaasunik qanoq amerlanerusunik sulilersitsisoqarsinnaanersoq, kiisalu kajumissutsimik sulisarnerat qanoq ingerlatiinnarneqarsinnaanersoq oqaluuserineqarpoq.
Sulilersitsisartut kajumissutsimik sulisut sulinerminni piginnaasaqarfigisai eqqumaffigissavaat. Inuussutissarsiortut, kommunit Namminersorlutillu Oqartussat sulisunik sulilersitsigaangamik, sulisut kajumissutsimik sulisimatillugit suliaminnut sukkanerusumik pikkoriffeqarnerulertarput.
Taamatuttaaq kajumissutsimik sulisimatilluni suliffigerusutap angunissaa ajornannginnerulertarpoq, suliffimmut utaqqinissaq pisariaqarunnaarsimatillugu.
Kajumissutsimik sulisimanikkut misilittagaqarneq inuusuttuaqqanut iluaqutaassaaq. Ingammik siullerpaamik suliffittaartussaatilluni. Tassuunakkut takutittarpaat tunniusimallutik. Tassani assersuutigalugu inuusuttuaqqat meeqqerivinni meeqqanik pinnguaqateqarnernut imaluunniit innuttaasunik utoqqarnik pisuttuaqateqarnernut atatillugu sulianik ataqatigiissaarisinnaanermut misilittagaqalersinnaapput, taamaasiornikkullu sulisartuunermut piareersimanerulissallutik.
-Innuttaasut kajumissutsiminnik sulileraangamik inuiaqatigiinnut inunnullu ataasiakkaanut naleqalersitsisarpoq. Ilaquttatsinnut eqqaamiutsinnullu ikiuisinnaanerput piginnaaneqarfigereerparput. Amerlanerusulli ikiorsinnaavagut kajumissutsimik sulinermi aaqqissuussinernik pilersitsisinnaagutta, Meeqqanut, Inuusuttunut, Ilaqutariinnut Peqqissutsimullu Naalakkersuisoq Mimi Karlsen taama oqaaseqarpoq.
Kajumissutsimik sulisarnermik misittakkatut naleqarluartutut ammaassisutullu isiginninneq inuiaqatigiinni kajumissutsimik sulisarnernut qanoq sinaakkutinik patajaallisaanissamut innersuussuterpassuit ilaanni takussutissaannaavoq. Tamannalu Kalaallit Nunaanni meeqqanut inuusuttunullu atugarliortunut kalaallit qallunaallu suleqatigiinnerannik patajaallisaanissamut ilaavoq.
Kajumissutsimik sulisarneq pitsaanerulersinniarlugu massakkumut KNR-ikkut kajumissutsimik sulisarneq pillugu paasititsiniummik ingerlatsisoqarpoq Paarisalu innuttaasunut, inuiaqatigiinni kattuffinnut, pisortat ingerlataqarfiinut, inuussutissarsiortunut aningaasaateqarfinnullu paasissutissartaqartumik nittartakkatigut qupperniliorluni.
Attavissaq
Paasisaqarnerorusukkaanni naalakkersuisup allattaa Frederik Kristiansen e-mailianut: frek@nanoq.gl oqarasuaataanulluunniit + 299 34 56 85 imaluunniit immikkoortortami Paarisami pisortaq Tina Evaldsen oqarasuaataanut +299 56 55 09 e-mailiannulluunniit tiev@nanoq.gl attaveqartoqassaaq.