airplanebooksbriefcase business cogs cross election entertainment fish house law lockmedicalpeopleselfservices socialtax

Ujaruk

6. maj 2024

Imminut toqunnerup pinaveersaartinnissaanut ilitsersuisunngortut 15-it

Pingasunngorneq maajip aallaqqaataani 2024-mi imminut toqunnerup pinaveersaartinnissaanut ilitsersuisut ilinniarnerminnik naammassipput.

Paarisa, Innuttaasut Peqqissusiannik Ilisimatusarfik (IPI) aammalu Livslinien Danmark suleqatigiillutik imminut toqunnerup pinaveersaartinnissaanut ilitsersuisussatut ilinniartut naammassinissaannik periarfissiipput. Ilinniaqatigiit tassaapput kommuneni, Tusaanngami, Innuttaasut Peqqissusiannik Ilisimatusarfimmilu sulisut.

Ilitsersuisutut ilinniarneq aallartippoq Kalaallit Nunaanni Imminut Toquttarneq Pitsaaliorniarlugu Nuna Tamakkerlugu Iliuusissatut Periusissiaq 2013-2019 suliarineqarmat, taanna maanna QAMANI – imminut toqunnissamik pinaveersaartitsineq pillugu periusissiaq 2023-2028-p tungaanut ingerlasoq nanginneruaa.

Kalaallisut ilitsersuisutut ilinniarneq Innuttaasut Peqqissusiannik Ilisimatusarfimmi ilisimatusarnikkut suleqataasumit Arnârak Patricia Blochimit, Livslinien’ilu suleqatigalugu ineriartortinneqarpoq.

Arnâqqap ukiuni arlalinni Kalaallit Nunaanni piorsarsimassutsikkut tulluartumik innuttaasunut IPI-p Paarisallu suleqatigiinneranut atatillugu sungiusaasarnissaq pingaartissimavaa. Ilitsersuisutut ilinniarneq ilisimatusarnermik Kalaallillu Nunaanni atuakkanik suliamut tassunga tunngassutilinnik, kiisalu Livsliniep imminut toquttarnermik pinaveersaartitsinermi immikkut ilisimasaannit misilittagaannillu tunngaveqarpoq.

Ilinniarnerup siunertaraa ilitsersuisunut makku tunniutissallugit:

  • Imminut toqunnissamut pinaveersaartitsinermik imminullu toqunnissamik eqqarsaateqarnerup suuneranik ilisimasaqalernissaq
  • Imminut toquttarnermut pissutaasartut pillugit ilisimatusarnerit ilisimasaqarfiginissaat
  • Imminut toqunnissamut ulorianartorsiortut aarlerinartorsiortullu paasinissaannut sakkussat tigussaasut
  • Aarlerinartorsiortitsisut illersuutaasullu pillugit ilisimasaqalernissaq
  • Imminnut toqunnissaminnik eqqarsaatillit, ilaqutaasut, imminnut toqoriarnikunut toqunnikunullu ilaqutaasut qimagaasimasullu oqaloqatiginissaanut periusissanik pikkorissartunut ingerlatitseqqiisinnaaneq
  • Imminut toqunnissaq pinaveersaartinniarlugu toqqissisimanartumik imminullu illersorsinnaasumik oqaloqatigiissutiginissaanut, kiisalu iliuusissatut periarfissat suunerinik ilisimasassat

Ilitsersuisut misilitsereerunik imminut toqunneq pinaveersaartinniarlugu sulialinnut pikkorissaasinnaalissapput.

Paasisaqarnerorusukkaanni Paarisa e-mailikkut paarisa@nanoq.gl-imut imaluunniit oqarasuaatikkut 34 50 00-mut attavigineqarsinnaavoq