airplanebooksbriefcase business cogs cross election entertainment fish house law lockmedicalpeopleselfservices socialtax

Ujaruk

27. maj 2024

Ataqatigiissitsisumik naapinneq

Paarisa Innuttaasut Peqqissusiannik Ilisimatusarfillu nuna tamakkerlugu Inuuneritta III-p naleraasa iluanni suliniutit assigiinngitsut pillugit ataatsimut paaseqatigiinnissaq pillugu suleqatigiipput

Naalakkersuisut periusissiaata Inuuneritta III 2020-2030-p atuutilersitsinissaanut atatillugu meeqqat inuunerinnerulernissaat pillugu suleqatigiinnissaq siunertaralugu Paarisa Innuttaasut Peqqissusiannik Ilisimatusarfillu suleqatigiillutik ataqatigiissumik siunertamut attuumassuteqartunik apriilip 24-anni 25-annilu 2024-mi naapitsitsipput.

Ataqatigiissitsilluni siunertaq pillugu naapitsitsinermut siunertaavoq nuna tamakkerlugu Inuuneritta III-p naleraasa sisamaasut iluanni suliniutit assigiinngitsut pillugit ataatsimut paaseqatigiinnissaq.

Meeqqat tamarmik inuunerinnissaat anguniarlugu tamatta immikkut suliagut pillugit ilisimasaqarnerulernissarput aamma siunertaavoq. Taamaasilluta tamatta anguniagaq ataasiusoq pillugu suleqatigiinnissatsinnut tunngavissaqarluarneruniassagatta – tassaasoq meeqqat inuunerinnissaat.

Ataqatigiissitsilluni naapitsitsinerup inerneri ukiunut arfinilinnut tulliuttunut suleqatigiinnermut tunngaviusussaapput, kiisalu periusissiap ingerlaavartumik malinnaaviginissaanut tunngaviussallutik.
Ulluni taakkunani marlunni suliamut attuummassutillit 40-t peqataapput.

Peqataasut immikkoortortaqarfinni ukunaneerlutik:

Paarisa, Innuttaasut Peqqissusaanik Ilisimatusarfik, Meeqqat Ineriartortut, Peqqissaasut, ernisussiortut, politiit, Unicef, Meeqqat Inuusuttullu Ataatsimoorfiat, Kalaallit Røde Korsiat, Kalaallit Meerartai, Ilinniartitaanermut Aqutsisoqarfik, Meeqqanut Inuusuttunullu Naalakkersuisoqarfik, Peqqinnissamut Naalakkersuisoqarfik, Kalaallit Timersoqatigiit, MIO, Nakorsaaneqarfik, Allorfik, Isumaginninnermut Aqutsisoqarfik.
Nuna tamakkerlugu kommuninilu ukiuni aggersuni assingusunik naapitsitsisarnissat pilersaarutigineqarput.