airplanebooksbriefcase business cogs cross election entertainment fish house law lockmedicalpeopleselfservices socialtax
Ikiorneqarit

Ujaruk

Illersuute­qarani atoqateqarneq

Illersuuteqarnak atoqateqaruit naartulersinnaallutilluunniit kinguaassiuutitigut nappaateqalersinnaavutit. Illersuuteqarani atoqateqarneq tassaavoq naartunaveersaatinik, soorlu usuup-puuanik p-pillenilluunniit, atugaqarnani atoqateqarneq, imaluunniit usuup-puuanik sipisoorneq p-pilletornissamilluunniit puiuisimaneq.

Peqqinnissa­qarfik attavigiuk

Kissaatiginngisannik naartulersimanissat ima­luunniit kinguaassiuutitigut nappaateqalersimanissat ernumassutigigukku peqqinnissaqarfiup ikiorsinnaavaatit.

https://www.peqqik.gl/kontakt

Ikiortissarsio­rit 

Illersuuteqarnak atoqateqarsimaguit kissaatiginngisannillu naartulersimanissat imaluunniit kinguaassiuutitigut nappaateqalersimanissat annilaangassutigigukku pingaaruteqarpoq piaarnerpaamik peqqinnissaqarfimmut ikiortissarsiornissat.

Illersuuteqarnani atoqateqarnerup kinguneri kissaatiginngisat killilersorniarlugit nammineq amerlanertigut iliuuseqartarsinnaavutit. Matumani piaartumik iliuuseqarnissat pingaaruteqarpoq.

Kissaatiginngisamik naartulerneq 

Naartulersoorsoraluni iisartagaq
Naartulersoorsoraluni iisartagaq illersuuteqarnani atoqateqarnerup kingorna naartulinnginnissamut atorneqarsinnaavoq. Naartulersoorsoraluni iisartagaq atoqateqareernerup kingorna sapinngisamik piaarnerpaamik aamma 72 tiimit (ullut pingasut) qaangiutsinnagit iineqassaaq. 12 tiimit siulliit iluanni sunniuteqarluarnerusarpoq.
Naartulersoorsoraluni iisartakkamik piumallutit illoqarfigisanni nunaqarfigisanniluunniit peqqinnissaqarfik attavigiuk.

Naartuersissinnaatitaaneq
Naartuersissaguit sivisunerpaamik sapaatit-akunnerini aqqaneq-marlussaanni naartusimasariaqarputit. Sapaatit-akunneri naatsorsorneqassapput kingullermik aaqarninni ullormit aaqalerfinnit siullermit.

Immikkut ittumik pisoqarsimatillugu sapaatit-akunneri aqqaneq-marlussaat kingorna kingusissukkut naartuersinnissamut akuersisoqarsinnaavoq. Akuersissummik qinnuteqarnissamut nakorsaq ikiuussinnaavoq.

Kinguaassiuuti­tigut nappaat 

Kinguaassiuutitigut nappaammik tunillatsissimaninnik pasitsaassaqaruit misissorneqarniassagavit illoqarfigisanni nunaqarfigisanniluunniit peqqinnissaqarfimmut saaffiginnissaatit.

Atoqatigiinneq nuannersuussussaavoq, kisianni pingaaruteqarpoq atoqatigisallu immissinnut illersornissarsi, taamaalillusi kissaatiginngisamik naartulerneq kinguaassiuutitigullu nappaammik tunillatsinneq pinngitsoorsinnaaniassagassigit, taakku tassaasinnaapput:

  • Kondylomer
  • Klamydia
  • Gonorre
  • Syfilis
  • HIV/AIDS

Naartunaveer­saatit 

Assigiinngitsunik naartunaveersaateqarpoq, kisianni usuup-puui naartunaveersaatini kisiartaallutik naartulernissamut kinguaassiuutitigullu nappaateqalernissamut illersuutaasarput.

Usuup-puuinik amigaateqarpit?
Usuup-puui illoqarfigisanni nunaqarfigisanniluunniit peqqinnissaqarfimmut akeqanngitsumik aaneqarsinnaallutilluunniit pisiniarfinni pisiarineqarsinnaapput.
Aamma internetikkut usuup-puuinik pisisoqarsinnaavoq.

Naartunaveersaartit pillugit siunnersorneqarusuppit?
Naartunaveersaatit pillugit oqaloqateqarumallutit illoqarfigisanni nunaqarfigisanniluunniit peqqinnissaqarfimmut sianersinnaavutit piffissamillu inniminniillutit, oqaloqatigiinnermi naartunaveersaat suna ilinnut naleqqunnerunersoq eqqartorsinnaavarsi.


Atuarsinnaasatit allat

Kinguaassiuutitigut peqqissuseq

Kinguaassiuutitigut peqqissuseq tassaavoq seksualitetimut tunngatillugu timikkut, misigissutsikkut inooqatigiinnikkullu imminut iluarisimaarneq. Seksualitetit inuunerit tamaat ineriartortarpoq, imminullu iluarisimaarninnut pitsaasumillu inuuneqarninnut attuumassuteqarluinnarluni.

Uani atuaruk
Qarasaasianni paasissutissat ilaat atoqqissinnaajumallugit quppernermi matumani cookie't atorneqartarput.Akueriuk annertunerusumilluunniit uani paasisaqarit.