Meeqqavit (atuartuuner­mini) nerisaqarnera

Peqqinnartunik inuussutissartaqarluartunillu ullaakkorsiorneq meeqqavit atuarfimmi ilikkagaqarsinnaaneranut ukkassisinnaassusaanullu pitsaanerpaanik periarfissiivoq ullullu sinnerani qanoq pissarsiaqartigineranut annertuumik sunniuteqarluni..

Ullaakkorsiutit peqqinnartut inuussutissartaqarluartut tassaasinnaapput: issingiassat immullit, paarnaaqqat/seqquluttut, paarnaq naatitaq ataaseq imal. iffiaq kilitaq immussualik marmeladilillu, paarnamik naatitamik ilallugu. Taamaaliornikkut kulhudrat, protein, orsoq, naatitat akui aseqqorluttut vitaminit mineraalillu agguataarluarneqassapput.

Sapinngisaq tamaat taqussat ullormiit ullormut assigiinngiiaartinnerisigut meeqqap pisariaqartitaasa tamakkertarnissaasa qulakkeernissaanut periarfissaavoq pitsaanerpaaq. Taqussat assigiiaaginnanngippata meeqqap taqussaminik nerinissaa annertunerussaaq. Tamakkerlugit nerinngikkaanni sinnerisa angerlaattarnissaat ajunngitsoq meeraq isumaqatigiissuteqarfigiuk. Taamaaliornikkut angajoqqaatut meeqqavit suut nerisarai suullu nerisanngikkai malussarfigissavat.

Taqussat pingaarutilinnik akoqartariaqarput:

• Naatitat: assersuutigalugu tamulugassiat kuloruuju, peberfrugti, agurki, radisit, kuanni tomatilu
• Iffiukkat: Iffiaq imaluunniit iffiaq-qaqortoq aseqqorluttunik akulik ajunnginnerussaaq
• Qallersuutissat: neqi, immussuaq imal. Mannik
• Aalisakkat: minnerpaamik aalisakkat arlaat ataaseq qallersuusiullugu
• Paarnat naatitat: paarnanit naatitanit tunguarnitsunillu assigiinngitsunit nutaanit aggukkat.

Timip imermik amigaateqalernera qasoqqanermik niaqorlunnermillu kinguneqarsinnaasarpoq. Taamaammat meeraanermiit ulloq tamaat imermik naammattumik imertarnissamik ilitsersorneqarnissaq pingaaruteqarpoq.

Meeqqap mikineraniit imermik, immummik saftimik il.il. imertittarnissaa pingaaruteqarpoq. Meeqqalli atualeraangamik anitsiarnerminni nerinerminnilu imermik imernissap nammineq eqqaamanissaa pingaaruteqarpoq.

Meeqqat imerfissaannik imaqanngitsunik nammineq ullup ingerlanerani pisariaqartitsineq naapertorlugu immertagassaannik nassartinnissaat iliuuserisinnaasat ilagaat. Tamanna pillugu meeqqap oqaluunnissaa eqqaamaneqassaaq, imermik naammattumik imertarnissap ilikkarnerata qulakkeernissaata tungaanut atuarfimmi naammattumik imersimanersut aperisassapput.

Kalaallit Nunaanni silaannaq panertorujussuuvoq illullu iluata silaannaa erniinnaq annikitsiuinnarmik isugutaqalersarluni. Atuarfinni atuartutut ullormut sivisuumik isersimasaraanni, ulloq naallugu imermik imerluarnissaq immikkut pingaaruteqarpoq. Meeqqap ullormut imeq liiterip ataatsip marlullu akornanniittoq imissavaa, inersimasulli ullormut imeq litterit marluk pingasullu akornanniittoq imissallugu.

Meeqqat nukisamik pisariaqartitsipput, aamma sukkutornikkut orsortornikkullu. Ulluinnarni meeraq assigiinngiiaartunik nerisarlunilu paarnanik naatitartortarnermigut, naammattumik sukkumik orsumillu pisassaaq.

Nerisassarpassuit soorlu ullaakkorsiutit, yoghurt kiisalu boorlut ineriikkat, ”sukkunik toqqortanik” akoqarput.Taamaammat meeqqat mamakujuttutorlutillu sodavannditortassagunik, sapaatip akunneranut ataasiaannarlutik tamakkutortarlik.

Meeraq sukkutorpallaaruni nerisassat peqqinnartut aqajaqqumini inissaarutissavai, taavalu meeraq naammattumik timersortanngikkuni oqimaappallaalernini ajoqutigilissallugu.

Meeqqat alapernaatsuupput meeqqallu mamarisaannik nerisassioraanni ilaqutariilluni nuannersumik nereqatigiinnissaq ilimanaateqarluarpoq. Taamaaliornikkut meeqqat nerisassioqataanissamut kajuminnerulissapput. Assersuutigalugu meeqqat unnummut sunik nerisassiorusunnersoq niuerniarnermilu peqataarusunnersoq aperisinnaavat.

Meeraq sap.ak. ataasiarluni ullormi aalajangersimasumi nammineq suut sassaalliutaanissaannik aalajangiili ataatsimoorlusilu nerisat inuulluutigisigik. Nerisat qanoq mamassuseqarnerat oqaluuserisiuk– taamaaliornikkut meeqqavit mamassutsinik oqaatiginnissinnaaneq ilikkassavaa. Tamanna avatangiisinik malussarsinnaassutsip ilisimaarilernissaanut meeqqallu sunik nererusunneranut nererusunnginneranulluunniit tunngatillugu piginnaasanik isummanillu inerisaanissamut periarfissiissaaq. Meeqqavit ukiuinut misilittagaanullu naapertuuttunik suliakkerneragut igaffimmi sulinermik aallartinnissaanut ikioruk.

Naammassinissamut neriffissamullu tunngatillugu aalajangersimasumik pilersaaruteqaqinak. Ataatsimoorlusi nuannersumik misigisaqarnissarsi pilersarutaali tullianilu nerisassiornerup nuannersuanik tunissuteqarfiginissaat tullianilu igaffimmeeqataanissamut kajungilernissaat anguniagassatut siunniullugu.

Meeqqat igaffimmi ikiuussinnaanerannut assersuutit:

• Naatsitanik paarnanillu naatitanik assigiinngitsunik errortuineq qalipaajaaneq agguineq, sequtserineq
• Neqimut aserortikkamut akussanik uuttortaaneq, manniit qupillugit akuliussineq aalaterineq frikadelliliassanik ilusiliineq
• Aalisakkanik/neqinik errortuineq, agguineq, kaattaaneq seernartuliineq/akoorineq, raspinik qalliineq imal. akuutissanik immiineq
• Iffiugassamut atortussanik uuttortaaneq, aalaterineq, minnerusunut agguineq boorluliassanik ilusilersuineq/ iffiugassamik ilusiliineq taniineq il.il.

Nerisassat tassaaginnanngillat inuussutissat. Nerineq ataatsimoornermut - ilaannilu assigiinnik nerisaqarluni nereqatigiinnermut ersiutaavoq. Nereqatigiinneq ilaqutariinni ataatsimoorfiugajuppoq.

Nereqatigiinneq meeqqanut pissusissamisoortutut angajoqaaniillu soqutigineqarsinnaaffittut misinnartuusariaqarpoq. Nerrivimmi nereqatigiinneq toqqissinermik, toqqammavissamik ilaqutariinnilu ilanik ukkassinermik tunisisarpoq. Tamanna meeqqanut inersimasunullu ullormut assersuutigalugu atuarfimmi pisut pillugit oqaloqatigiinnissamut aalajangersimasumik ileqqoqarnissamut periarfissiisarpoq.

Meeraq ullormi ilungersuuteqarsimasinnaavoq nereqatigiinnermilu tusaaneqartutut misigaluni ingerlariaqqissinnaanngorlugu oqaloqatigineqarsinnaavoq. Unnukkut nereqatigiinneq ilaqutariittut qaninnerulersitsisinnaavoq. Ulluinnarni ulapaarfinni immitsinnut puigupassissinnaasarpugut. Nereqatigiinnerni toqqammavissanik meeqqanut toqqissinermik, misigissutsinik uummammit pisunik asaneqarnermillu misigilersitsisumik pilersitsisoqarsinnaavoq.

Ilaqutariinni nereqatigiittarnerni oqaloqatigiinneq ilinniarneqartarpoq. Ataqqinnissuseqartumik oqaluussineq naalaarnerlu meeqqat ilinniartarpaat.

Oqaloqatigiinnerit meeqqat oqaatsinik nalunngisaannik annertusisitsisarput oqaatiginissaannullu ilinniartitsisarlutik. Piffissani aalajangersimasuni peqqinnartunik nerineq suleqatigiinnerlu ass. peqatigiilluni nerriviliornikkut, nerereernermi atortunik piiaanikkut erruinikkullu ilikkarneqartarpoq.

Nereqatigiinnermissaaq pissuserissaarneq ass. allat niusiteqqaarnerisigut nerereernermilu qujanikkut ilikkarneqartarput. Ataatsimoorluni nereqatigiittarneq meeqqat oqimaaqatigiinnerusumik peqqinnarnerusumillu inuunissaannut iluaqutaavoq.