Atuarsinnaasatit allat
Niuerniaraangavit ilisarnaat maliguk
Kattulluta inuunerittap ilisarnaataata neqeroorutinut quppersakkani pisiniarfinnilu nioqqutissanut peqqinnartunut aqqutissiussavaatit. Ilisarnaat malikkukku pisiniarnermi peqqinnartumik toqqaanissaq ajornannginnerulersissavaa.
Kattulluta inuunerittap ilisarnaatigaa niuerniarnermi koori nioqqutissanik peqqinnartunik imalik allassimallunilu: Kattulluta inuuneritta – Sammen om det gode liv.
Ajornartorsiutit pisariusut soorlu innuttaasut peqqissusaannik siuarsaaniarneq, suliaqartumit ataatsimit taamaallaat aaqqinneqarsinnaannginnera, suliassaqarfiilli akornanni siammasissumik suleqatigiittoqartariaqarnera, peqatigiilluni suleqatigiinnermi aallaaviuvoq. Peqqinnartumik aalajangiinerup ajornanngitsuunissaa toqqagassaqqissuunissaalu, tassuunakkullu inuunerissaarnermik siuarsaaneq ataatsimoorutissavarput.
Piviusoq
Paarisa, Brugseni, Pilersuisoq aamma Pisiffik peqatigiilluni suleqatigiinneq Kattulluta inuuneritta – Sammen om det gode liv ataatsimoorfigaat.
Peqatigiilluni suleqatigiinneq 2030-p tungaanut ingerlassaaq Naalagaaffiillu Peqatigiit nunarsuarmi anguniagaat pingaartumik anguniagaq 3: Peqqissuseq
Atugarissaarnerlu aamma nunarsuarmi anguniagaq 17: Suleqatigiinnikkut Anguniagaqarneq, aallaavigineqarlutik.
Nioqqutissanik peqqinnartunik tunisaqarnerup annertusarnissaa ataatsimoorluta sulissutigaarput. Taamaaliorpugut nerisagut imikkagullu nerisassanullu tunngatillugit ataatsimoorneq peqqinnissatsinnut atugarissaarnitsinnullu isumalerujussuummata.
Suliniutit aallartitagut peqatigiilluni suleqatigiinnermi uuttortartassavagut. Iliuutsitta ilumut iluaqutaanissaa qulakkeerniarlugu taamaaliorpugut. Ukiut tamaasa taamaammat innuttaasut peqqissusaannik inuunerannillu siuarsaaqataasunik anguniakkanik aalajangersimasunik uuttortarneqarsinnaasunillu toqqaasassaagut.
Takorluugaq sulissutigisarlu
Peqatigiilluni suleqatigiinnermi takorluugaq:
Siunissaq peqqinnerusoq atugarissaarfiunerusorlu, pingaartumik kinguaariinnut maanna peroriartortunut
Peqatigiilluni suleqatigiinnitsinni:
- Peqqinnartumik ileqqoqarnissaq pillugu ilisimasanik isumassarsiorfissanillu innuttaasunut siammarterineq
- Toqqagassaq peqqinnartoq oqinnerusumik pissusissamisoortumillu toqqagassanngortinnissaa Nerisaqarnermullu innersuussutinik qulinik atuisut amerlinissaat
- Peqqinnartumik nerisaqarnerup naleqquttumillu imigassartortarnerup siuarsarneqarnissaa
Anguniagaq
Peqatigiilluni Suleqatigiinneq 2020-2030-mi tamakkiisumik anguniakkat:
- Nioqqutissani peqqinnartut nioqqutigineqartut amerlanerpaanngornissaat
2024-mi anguniakkat
2023-mi anguniakkat nanginneqarput makkuupput:
- Naatitanik qerititanik annertunerusumik tunisaqarneq
- Naatitanik qerisuunngitsunik annertunerusumik tunisaqarneq
- Nioqqutissanik matuersaammik ilisarnaatilinnik annertunerusumik tunisaqarneq
- Nerisassanik peqqinnartunik tunisaanerpaat 30-t akornanniittunik suli annermik tunisaqarneq
- Suleqatigiinneq suleqatigiinnerullu ilisarnaataa pillugu ilisimasaqarnerulersitsineq. Anguniagaavoq innuttaasut 75 procentiisa suleqatigiinneq pillugu aammalu sooq suleqatigiittoqarnera pillugu ilisimasaqarnerulernissaat
- 2024-mi anguniagaq nutaaq: imeruersaatinik aalakoornartortaqanngitsunik annertunerusumik tunisaqarneq
Peqatigiilluni suleqatigiinnermi inernit
2023-mi inernerit:
- Siorna 2023-mi naatitanik tunisaqarneq 2022-mut naleqqiulluni allannguuteqanngitsoq
- Naatitanik qerititaanngitsunik tunisaqarneq 2022-miit 2023-mut procentimik ataatsimik qaffariaateqartoq
- Nioqqutissanik matuersaammik ilisarnaatitalinnik tunisaqarneq 2022-miit 2023-mut procentinik marlunnik qaffariaateqartoq
- Pisisartut 43 procentiisa peqatigiilluni suleqatigiinnerup imarisaa ilisarnaataalu ilisimavaat
- Pisisartut 73 procentiisa ilisimavaat peqatigiilluni suleqatigiinnermi ilisarnaatit suliffeqarfiit suut ilisarnaatigineraat
Ukiumoortumik nalunaarusiaq 2023 uani atuarsinnaavat.